Ut i Os i påsken?

Atle Skaar (Kafé Ole B), Papaslide (Peppes), PV Staff (Irish Cat) og Calle Hamre (Irish Cat) er blant dei som speler i Os i påsken.

SJÅ PROGRAM NEDST I ARTIKKELEN

I tillegg kan du få ein forsmak på eit av banda som kjem til Søfteland Rock N LoL til sommaren, Major Parkinson kjem nemleg til Os og Bar2Be i påsken og osingane i Neoplasma står for oppvarminga.

– Major Parkinson-konserten blir nok det største som skjer i Os i påsken, vi synes det er utruleg spennande at dei kjem til Bar2Be, seier dagleg leiar Marianne Curtis.

– Viktig tid

Påskefestivalen kallar Bar2Be programmet sitt, påsken er viktig tid for utelivsbransjen, at den kjem seint, og med sol, gjer nok grunnlaget for ein god fest endå betre.

– Vi har tre store jam-ar i løpet av året, sommar, jul og påske. I heile vinter har jam-en gått med Vegard Skorpen om torsdagane, no kjem storebror Olav med mange musikar-vennar og lagar påskejam. Vegard speler om torsdagen med bandet sitt, fortel ho.

Første påske på Irish Cat

Irish Cat har hatt LIVE-musikk kvar helg i heile vinter. No er dagleg leiar Ole Christian Garmanni spent på korleis den første påsken for den nye nattklubben i Os blir.

– Eg har høyrt at påsken i Os er livleg og reknar med spesielt godt besøk onsdag og laurdag.

– Quiz om torsdagen er alltid bra og 90-talskongen Helge Andersen som DJ om fredagen kan nok også slå bra an, trur Garmanni.

Papa Slide og programslepp på Peppes

Torsdag i førre veke la Osøren Blues & Jazzfestival ut billettane til Vamp-konserten i Oseana torsdag 23. juni, laurdag 23. april blir det programslepp på Peppes.

– Konsertserien vi har hatt om fredagane på Peppes i haust og vinter har vore ein stor suksess. Til programsleppet har vi skifta dag, til laurdag, og fått Papa Slide til å stå for musikken, seier Per Kristian Hægland nøgd.

Papa Slide, alias Rune Nordvik, har saman med banmedlemmane Arild Seim (gitar), Geir Rognø (bass) nyleg kome med albumet «What are we living for».

UTELIVET I OS I PÅSKEN

Onsdag 20.4: PV Staff (Irish Cat)
Onsdag 20.4: Påskejam (Bar2Be)
Onsdag 20.4: Atle Skaar (Kafé Ole B)

Torsdag 21.4: Rock N Roll Quiz (Irish Cat)
Torsdag 21.4: Calle Hamre (Irish Cat)
Torsdag 21.4: Vegard Skorpen Band (Bar2Be)

Fredag 22.4: Major Parkinson, Neoplasma support (Bar2Be)
Fredag 23.4: DJ Helge Andersen (Irish Cat)

Laurdag 23.4: Quiz og dans, Kurt´n med band (ungdomshuset i Øyane)
Laurdag 23.4: Atle Skaar (Kafé Ole B)
Laurdag 23.4: Papa Slide (Peppes)
Laurdag 23.4: DJ Jonas (Bar2Be)

Søndag 24.4: Påskenachspiel med LIVE-musikk (Bar2Be)
Søndag 24.4: Reparering og restefest (Irish Cat)