Utforkøyring og brann i bosspann

Det var lite trøbbel på glatten då vinteren i går kom til Os, men på ettermiddage var det ein som hamna i grøfta.

Midtsiden fekk tips om ulykka klokka 14.55.

– Ein bil ligg i grøfta i Åsen. Det hindrar ikkje trafikken i å passera. Det står folk ved bilen og det ser ikkje ut som om nokon er skadd, fortel tipsar.

Politiet fekk melding om ulykka i 15.30-tida, og stadfestar at ingen blei skadd.

– Vi kjem heller ikkje til å oppretta sak, seier politioverbetjent Christine Grindstein.

Brann i bosspann i busskur

I 22.45-tida fekk politiet melding om brann i bosspann i eit busskur ved Amfisenteret.

– Brannen var sløkt då vi kom fram. Vi veit ikkje om nokon har tent på med vilje eller om det for eksempel er nokon som har vore lite varsam og kasta ein sneip i bosset.

Politiet gjorde nokre undersøkingar og patruljerte i området før dei avslutta på staden.

I førre veke var det brann i to bosspann i Os sentrum. Då stakk det fire ungdomar frå staden før politiet kom fram.