Utvidar terminalen

Formannskapet bestemte torsdag å godkjenna den nye leigeavtalen med Os Taxi og samstundes løyve 1,8 millionar til utviding av terminalbygget.

Vedtaket fatta dei utan diskusjon.

- Dette er eit lite kinderegg med to positive saker, meinte ordførar Terje Søviknes (Frp).

Os Taxi får større areal og ein får rusta opp Osøyro.

Doblar arealet

Os Taxi har sidan 1995 leigd "drosjebua" på vel 40 kvm. Opprinneleg var 8 parkeringsplassar inkludert i leigeavtalen. Dette har seinare blitt utvida til 16 plassar, noko som er det same som antall drosjeløyver.

I samband med reforhandling av leigeavtalen har kommunen fått teikna ei utviding av terminalbygget frå 40 til 83 kvm bruttoareal.

- Vi har hatt utvidinga ute på Doffin og akseptert det billigaste tilbodet frå Vestafjell.

- Dei reknar med å bruke 60 arbeidsdagar på bygginga, skriv Tor Inge Døsen i saksframlegget.

Aukar leigeprisen

I samband med utvidinga vil kommunen samstundes ta ei viss oppgradering/ombygging av dagens areal. Mellom anna vil det bli bygd to handicap-toalett for å oppfylla arbeidsmiljølova sine krav til universell utforming. Utvidinga vil skje i same byggjestil som dagens bygg.

Tor Inge Døsen har framforhandla den nye leigeavtalen med Os Taxi.

- Administrasjonen meiner at ei reell husleige må gjenspegla den reelle årskostnaden som ligg i saka, skriv Døsen.

Med ei avskriving over 20 år vil den månedlege leigekostnaden auke frå dagens vel 3000 kroner til 13.500 kroner.

Fann pengar på brannstasjonen

Utvidinga og ombygginga av terminalen vil bli finansiert ved å overføra 1 800 000 kroner i ubrukte midler frå Os Brannstasjon.

- Prosjektet Os Brannstasjon er ikkje endeleg avslutta med framlagt prosjektrekneskap, men det kan sjå ut til at dette prosjektet kan avstå mildar til utvida lokale til Os Taxi.

- Administrasjonen sitt framlegg til finansiering av dette prosjektet skjer ved overføring av disponible midlar frå prosjektet Os Brannstasjon som er under avslutning, skriv Døsen.

Formannskapet godkjende denne omdisponeringa.