Utviding og plan om sal

Os Hagesenter blir utvida med «to toppar», tilsvarande gartneribygg som som dagens senter har tre av. I tillegg til 1100 kvadratmeter med varmt areal får senteret overbygd uteareal på 900 kvadratmeter i nytt tilbygg.

- Vi kjøpte tomta nord for hagesenteret rundt 2006-2007, seier Espen Lyssand.

Espen og broren Bård eig både Os Hagesenter AS og dei to eigedomsselskapa som sit på tomtene og bygningen.

- For det første skal det bli godt med tak over uteavdelinga, for det andre så blir utvalet større, så det vil bli behov for betre plass også inne.

Dagens salsområde utandørs, som ligg på parkeringsplassen mellom hagesenteret og Byvegen, blir til parkeringsplass igjen når tilbygget er ferdig.

Når arbeidet med tomta er ferdig blir det byggestopp gjennom høgsesongen, frå april til og med juni. Så startar byggearbeidet for innflytting i den varme delen i desember i år og utearealet i mars 2012.

God vekst

Os Hagesenter AS, som i dag er med i Hageland-kjeden, har hatt aukande omsetnad dei siste åra. Også resultata har vore positive og veksande.

- Utviklinga har vore fantastisk fin. Vi har lagt bak oss tre gode år og bygger no for framtida, seier Lyssand.

Omsetnaden har vakse frå 19,1 millionar kroner i 2007 til 21,9 millionar kroner i 2009.

Resultatet er snudd frå 500.000 i minus i 2007 til 1,6 millionar kroner i pluss i 2008 og 2,5 millionar kroner i pluss i 2009.

Kan bli selt

Den siste tida har det vore snakk om at kjeden Plantasjen skal kjøpa Os Hagesenter.

- Plantasjen kontakta oss første gong for 5-6 år sidan, og vi har vore i samtalar med dei fleire gongar. No har vi skrive intesjonsavtale om sal av driftsselskapet, fortel Lyssand.

Blir partane, konkurransetilsyn og juristar nøgd innan 30. juni blir Os Hagesenter AS selt til Plantasjen med overtaking 1. oktober i år.

- Eigedomane held vi på og utvidinga vi no har starta på ville vi tatt uansett, seier Espen Lyssand.