Politi | 02. jan. 2023

Varsla politiet om fem hjort på og ved ny E39

– Dei vandra inn og ut av motorvegen.

Varsla politiet om fem hjort på og ved ny E39
To hjortar langs køyrefelta i retning sør. I går kveld sto fem hjort på motsett side, i bakgrunnen på bildet. (Arkivfoto: Kjetil Vasby Bruarøy)
Kjetil Vasby Bruarøy
Kjetil Vasby Bruarøymandag 02. jan. 2023 08:43

Søndag i 22.30-tida blei politiet varsla om fem hjort som gjekk på og langs E39 ved køyrefelt retning nord ved Skogafjellstunnelen.

– Det var heldigvis ingen som var påkøyrd, men dyra skal ha vandra fram og tilbake i vegbanen, seier politioverbetjent Atle Birkeland.

Politiet varsla vidare til Vegtrafikksentralen, og ba dei følgja med på det dei har av kamera på det nye vegsystemet.

Hjort på og langs E39 i Svegatjørn-området har vore til uro frå før vegen opna.

Etter opninga for to månadar sidan har det, så vidt Midtsiden har fått med seg, ikkje vore andre teikn til påkøyrsle enn éin enkelt hjort som blei observert haltande ut av Skogafjellstunnelen.

Men hjorten ser ikkje ut til å ha blitt skremt vekk av at det kom trafikk på den nye vegen.

Tomas Cymermonas, som filma hjort vandrande på motorvegen dagen før opning, fortalte i november at han såg hjort på eller ved vegen nesten kvar morgon.

I 2017 blei det sett opp viltgjerde i Endelausmarka for å hindra hjort å gå utfor nye skjeringar i terrenget - og for å hindra påkøyrslar.

Det 2.460 meter lange gjerdet har ei høgde på 2,45 meter.

Då Midtsiden før opning av ny E39 spurde prosjektleiar Kelly Iversen om planar for Svegatjørn, sa ho at det ville vera nærmast umogleg å skjerma eit område med så mykje av- og påkøyrslar, men at det kunne bli aktuelt for eksempel å bygga gjerde frå tunellopninga retning sør, for å hindra at du møter hjort med det same du kjem ut av holet.

Fartsgrensa på staden er 80 km/t. Det er inne i tunellen retning sør skilta med fare for hjort.

Spennande? Vil du ha ukas høgdepunkt i innboksen?

Les meir om

Last ned Midtsiden-appen idag

No kan du følgja nyhende frå Os - rett i appen.

  • Gratis å lasta ned
  • Bli varsla straks noko skjer
  • Tilgjengeleg i App Store og Google Play Store
Last ned appen

For å få tilgang til alle sakene i appen må du vera abonnent.