Vegdebatt skapte temperatur

I tenesteutvalet presenterte teknisk sjef Marianne Kramer hovudplan for kommunale vegar fram mot 2024 og rapporten administrasjonen hadde fått utarbeidd av konsulentar.

– Forfallet på ein del av vegane er stort.

– Det ligg nokre kostnadsberekningar i rapporten både på å utbetra forfall og kva drift og vedlikehald vil kosta om vi kjem over kneika, fortalde Kramer.

Rapporten syner at ein treng 30 millionar kroner for å koma ajour.

Reagerte på rapporten

Vararordførar Marie Bruarøy (H), som stilte som vara for Turid O. Lunde (H) reagerte på rapporten og tala som blei lagt fram.

– Eg hadde venta ei prioriteringsliste.

– Dette er eit typisk konsulentverk som kjem på bordet vårt.

– Det syner eit svært vedlikehaldsetterslep og ser heilt grotesk ut. Der ikkje nødvendigvis så ille, meinte varaordføraren, som peika på at det ikkje var berre å hoste opp 30 millionar over natta.

Ho lurte òg på om det var gjort konkrete vurderingar av tilstanden på vegane eller om det berre var eit skrivebordsarbeid frå konsulentane.

– Det er dokumentert med befaring, bileter og det heile, forsikra Kramer.

– Tvil om innhaldet?

Varaordføraren si haldning til rapporten fekk arbeiderpartiet sin Arild Mads Nilsen til å reagera.

– Er det slik at representanten Bruarøy sår tvil om sannhetsgehalten i rapporten?

– Den avdekkjer store behov for innbyggjarane i Os å få retta opp i.

– Då må poenget vera at vi politisk sett freister å finna midler til å gjera noko med det.

– Frp/H er jo for vegvedlikehald, i allefall i det offentlege rom, men vi har ikkje sett så mykje til det dei åra dei har hatt makta i kommunen, kommenterte Nilsen.

Visste ikkje om rapporten

Det fekk posisjonspolitikarane til å ta til motmæle.

– Det er bra at Ap erkjenner at det trengs vegvedlikehald i Noreg.

– No har vi ein samferdselsminister som har snudd vedlikeholdsbudsjetta etter å ha tatt att eit enormt etterslep, svarar Eirik Andre Hesthamar (Frp).

– Også lokalt har vi vore opptekne av vedlikehold. Vi har oppretta vedlikeholdsteam og lagt inn ekstra middel i årets budsjett, supplerte Marie Bruarøy.

– Jo, men de har tross alt regjert denne kommunen i 16 år.

– Om de ikkje er tatt med buksa nede, så er de avkledd i denne debatten. Å trekka inn samferdselsministeren blir berre feil, repliserte Nilsen.

Paal Moberg (Ap) følgde opp med å spørja om Frp/H visste om rapporten i forkant av budsjetthandsaminga.

– Nei, det gjorde vi ikkje.

– Eg stilte spørsmål om korleis innhaldet var berekna. No fekk eg stadfesta at dei faktisk har vore ute og sett på det, svara Bruarøy.