– Veldig kjekt at Terje kom
Då Os karateklubb feira sine første 30 år, og klubbens første EM-bronse i allstyle, dukka ordførar Terje Søviknes overraskande opp med blomar, tale og gåvesjekk til Åsmund Slettevold.
Kjetil Vasby Bruarøy
For ei veke sidan kom Åsmund Slettevold heim frå Tyrkia med bronsemedalje frå junior-EM allstyle.
Les òg: Tok imot EM-helten
Medaljen blei i første omgang feira av familie og klubbkameratar på middag på Restaurant Engeline, der dei vaksne i klubben frå før var samla for å feira at Os Karateklubb er 30 år.
Laurdag var det feiring for ungane og ungdomane, som hadde fylt musikkrommet på Kuventræ skule for å kosa seg med pizza og kaker.
Ordføraren gjorde stas på Åsmund
Med på feiringa var naturlegvis Åsmund, som blei gledeleg overraska over ordførar-besøk.
– Det var veldig kjekt at han blei med på festen, og at han i tillegg kom med både blomar og gåvesjekk, seier Åsmund.
Blei sitjande
Søviknes var eigentleg "berre innom" på ein travel laurdag, men då karateklubben byrja å snurra film på storskjerm blei han sitjande.
– Lillian, mor til Åsmund, hevdar at ho ikkje er så stødig på pc. Men ho hadde laga ein flott kavalkade over Åsmund sine karate-år, frå starten i 2005, fortel trenar Vidar Mjånes.
Etterpå fekk dei rundt 80 festdeltakarane sjå video av Åsmund sine kampar i EM.
– Eg sat med Søviknes og forklarte reglar og kva det blei gjeve poeng for i kampane.
Det kan koma godt med. Når Åsmund er i fighten går det fort.
Midtsiden samleside: Karate