Ventar på rapport

Saka om kvinna som er sikta for drapsforsøk på Os sjukeheim ligg framleis på lensmannskontoret.

Kjetil Vasby Bruarøytorsdag 30. apr. 2009 10:29

Saka om kvinna som er sikta for drapsforsøk på Os sjukeheim er ikkje sendt over til rettsvesenet. Os lensmannskontor ventar framleis på rapport dei treng for å få papira klare.

- Vi ventar på rapporten frå kriminalteknisk. Etterforskinga er meir eller mindre ferdig frå vår side, men vi treng denne rapporten for å få sendt saka frå oss, seier lensmann Rasmus Dalen til midtsiden.no.

- Kva skal denne rapporten fortelja meir om?

- Ein del sentrale element. Detaljar vil eg ikkje inn på.

- I midten av februar var status den same. For pårørande og sikta, særleg om ho er uskuldig, kan dette vera lenge å venta. Burde prosessen gått raskare?

- Det blir stilt stadig strengare krav til det som blir sendt vidare til rettssystemet, men når ikkje det blir putta inn ekstra ressursar i andre enden så får vi dessverre ikkje nok kapasitet.

- Men i møte i går hadde vi saka oppe internt, og vi vil no purra på å få rapporten ferdig og oversendt til oss så vi kan få saka vidare til rettssystemet, seier Dalen.

Om saka:
• 27. januar gjorde VG.no det kjent at ei tilsett ved Os sjukeheim er sikta for drapsforsøk på ein sjuk og døande kvinneleg pasient.
• Pasienten døydde to dagar etter drapsforsøket, truleg av sjukdom.
• Ein kollega skal ha sett det påståtte drapsforsøket og varsla leiinga, og administrasjonen i Os kommune varsla så politiet.
• Kvinna blei pågripe i heimen sin, tatt til avhøyr, fjerna frå stillinga si og fekk raskt status som sikta.
• Det skal ha lukta alkohol av kvinna den dagen det påståtte drapsforsøket skjedde.
• Sikta har ikkje vore varetektsfengsla.