Veum i Solbakkestova

Forfattarjubileum og ny plate, sundag er det tid for ny Vargtime.

Kjetil Vasby Bruarøytorsdag 15. okt. 2009 11:00

I dag er det eitt år sidan Varg Veum-skulpturen til Mæland blei avduka, på bursdagen til Varg Veum, utanfor puben Andre I Femte på Strand Hotell i Bergen. Der er det bursdagsfeiring også i år.

- Eg skal ned sjølv, blant anna fordi det er sleppefest for Vargtime 3, seier kunstnar Vidar Bratlund Mæland.

Jan Kåre Hystad Kvartett si plate kjem i hyllene over helga, men blir både å høyra og for sal på Solbakkestova sundag. Vargtime 3, Something Good, får terningkast 5 i BT.

40 år som forfattar
Varg Veum-kvartetten følgjer Gunnar Staalesen med krimheltens favorittmusikk. Forfattaren sjølv har også noko utanom bursdagen til Veum å feira. Det er nemleg 40 år sidan han debuterte som forfattar med romanen "Uskyldstider".

Innspelinga av neste film byrjar i slutten av oktober. Neste bok om Veum er venta i 2010.

- Kom tidleg
- I fjor var første gong vi hadde Vargtime. Det var ei flott oppleving, og Solbakkestova var full av folk, fortel Vidar.

På Vargtime er det både musikk og litteratur, Staalesen les tekstar frå bøkene sine, nokre faste og kjente, andre nye.

- Det kan vera lurt å koma litt tidleg, vi sel berre billettar i døra, seier Vidar om Vargtimen, som startar klokka 20 førstkomande sundag.