VIDEO: Lysekloster - Os

Bildeserie:

1 av 10

Laurdag spelte Lysekloster heimekamp mot Os.

Sol og publikumsrekord (cirka 700?) gav, saman med derby-faktoren, ei strålande ramme på kampen.

Lysekloster - Os 2-2 (0-1)
Målskårarar: Christer Olsen (0-1), Preben Borgen (0-2), Kim Kleivedal (1-2) og Eirik Indredavik (2-2).
Gule kort: Børge Borgen, Torkel Hjertnes, Joakim Hovden
Dagens Lysekloster-spelar: Kjetil Hansen

SJÅ VIDEO NEDST I ARTIKKELEN

Lysekloster: Kjetil Hansen - Baste Jonassen, Ørjan Skilbrei, Kim Krogsethagen, Sigve Rørstad (Preben Skorpen) - Frode Buvik, Martin Eidsvik (Lars Henrik Skage), Eirik Indredavik - Johannes Jordal, Joakim Hovden og Kim Kleivedalen.

Os: Anders Kloven - Håvard Grøteide, Stian Lunde, Børge Borgen, Torkel Hjertnes - Anders Kinden (Mats Lepsøe), Preben Borgen, Roar Vestbø - Ørjan Glesnes (Henrik N. Dale), Erik Kanestrøm og Christer Olsen

Eit lite stykke ut i kampen viste gjestane seg som mest farlege, og kom med flest av dei større sjansane.

Men skåringa kom overraskande på både publikum og spelarar, då Olsen fyrte til ein ball som dabba, fekk god dupp på eit hardt skot som først såg ut til å gå godt over mål, men skrudde seg ned bak ein bakkande Kjetil Hansen.

Hansen gjorde ein svært god kamp og blei kåra til dagens Lysekloster-spelar. Også Kloven i Os-målet gjorde det godt i den produktive kampen, og fekk sitt å henga fingrane i.

For dei siste 15 minutta var det heimelaget som kjørte på, men 0-1 sto seg til pause.

Frå 2-0 til 2-2

Også andreomgangen blei sjanserik til begge lag, men Os auka til 2-0 før Lysekloster skåra.

Preben Borgen kom seg gjennom og var svært presis då han skaut stang-inn i lengste hjørne, frå ganske spiss vinkel forbi ein Hansen som kom stormande imot.

Men Lysekloster hadde ikkje gjeve opp. Kombinasjonen Jordal-Jonassen, som vi ofte ser herjar på høgresida når Lysekloster speler kamp, såg vi lite til før pause. Men det var høgrebacken Jonassen som var på offensiven og førte av eit knallhardt innlegg langs bakken, omtrent frå dødlinja, då Lysekloster reduserte.

Skåringa blei kreditert Kim Kleivedalen, men på Midtsiden-fotograf Henrik Mjelva sitt bilde ser det ut som om Jonassen har fyrt innlegget via Os-kaptein Lunde sin fot og inn. Vi førebels har ikkje høyrt med Lunde om det stemmer.

Etter reduseringa fekk heimelaget vatn på mølla. Os hadde sine sjansar til å auka til 1-3, men dei største sjansane var det Lysekloster som hadde, med skot og headingar i stolpe og tverrliggar.

Og drygt tre minutt på overtid kom utlikninga, etter litt klabb og babb feltet, og ein retur frå Kloven, kunne Eirik Indredavik tuppa inn 2-2 til stormande jubel frå den fullsette tribunen.

– Kvar sin omgang

Os-trenar Tore Nielsen seier han først syntes det var bittert å få uavgjort på overtid, men at han ser at heimelaget fortente poeng.

– Eg er nøgd med innstillinga til dagens kamp, men litt skuffa over at vi er så lite besluttsame på overgangar. Vi kunne fint fått inn 3-1-målet, og då trur eg lufta ville gått ut av Lysekloster-ballongen.

– Men vi tar eitt poeng borte, mot eit godt lag, og det skal vi vera nøgd med.

– Det ville vore eir ran om vi stakk av med alle poenga i dag, innrømmer assistenttrenar Bjørn Mjelva.

Lysekloster-trenar Thomas Sandal har også sine ting han er nøgd og mindre nøgd med.

– Vi har ikkje den aggressiviteten vi skal ha frå start, spesielt i eit derby som dette. Os er betre enn oss i første omgang, men i andreomgangen synest eg det berre er eitt lag på banen.

– Då utlikninga kom var eg letta, i etterkant er eg skuffa over at 2-2-målet ikkje kom tidlegare. I så fall ville vi fint ha vunne denne, for Os såg ut til ikkje å ha meir å koma med.

Siste og første

Sigve Rørstad hadde sin siste kamp for Lysekloster på ei stund, då han tar seg eit år i Afrika.

Henrik Dale, som studerer og speler i Skottland, har trent med Os i sommar og fekk sin debut i dag.

Andre resultat frå 14. runde:
Vardeneset slo Øystese 2-0 og klatra forbi Os på tabellen.
Fyllingsdalen 2 slo Austevoll 4-1.

Lysekloster held seg på 2. plass etter poengdelinga, Os gjekk ned frå 4. til 5. plass.

Sjå tabell

VIDEO: Sjå 5 minutt med sjansar og skåringar i Lysefjorden laurdag (Foto: Kjetil Vasby Bruarøy)