Vil selja barnehagen

Sal av kommunale eigedommar som kommunen sjølv ikkje treng lenger har vore ei forutsetning for finansieringa av fleire av dei kommunale utbyggingsprosjekta dei siste åra.

Til formannskapet onsdag i neste veke får politikarane to eigedommer som administrasjonen foreslår blir lagt ut for sal.

Det eine salet gjeld området i Greidalen som kommunen no er i ferd med å opparbeida med steinmasser frå Ohara-utbygginga.

– Samla areal som er tenkt lagt ut for sal til utbyggar er omlag 32,5 dekar. Utbyggingstomten er områderegulert, men ikkje detaljregulert, skriv okonomirådgjevar Eivind Solberg i saksutgreiinga.

Kjøpar må sjølv stå for detaljreguleringa av området.

Godkjent for blokker

Det andre området kommunen no vil kvitta seg med er den gamle barnehagetomta i Mobergshaugen. Området er omlag 6 dekar og namngitt BB6 i områdeplanen for Os vest.

– I områdeplanen er område BB6 er sett av til blokker i inntil 3 etasjar med underliggande parkering. Området vil få avkjøring til kommunal veg – Stegen. Det er for alle byggeområder for blokk stilt krav om minste uteopphaldsareal. Dette arealet kan dekkast inn på bakkeplan, på parkeringsdekker og på takterassar, heiter det i saksutgreiinga.

Begge sala skal skje i tråd med dei retningslinene kommunestyret vedtok i april, kor hovudprinsippet er at salet skal gjerast til høgstbydane i den opne marknaden, men at kommunen kan gå i direkte forhandlingar med aktuelle kjøparar.

Saka blir endeleg avgjort i kommunestyret 27. september.