Vil slå NHH

Sundag spelar Os heimekamp mot eit lag som har tapt seks av åtte kampar. NHHI blir likevel ikkje undervurderte.

Kjetil Vasby Bruarøylørdag 14. nov. 2009 11:33

Handballdamene til Os starta sesongen med tre sigrar. Så kom tre tap på rad, nokre av dei i jamne kampar der motstandarane har drege ifrå i andre omgang.

- Vi kunne nok vunne fleire av desse siste kampane. Det er galskap og guts Os er kjent for, og det er det som må til for å henta seg inn om vi hamnar bak, seier trenar Kenneth Husebø.

- Galskapen kan ikkje vi trenarar mana fram, den må spelarane sjølv stå for, legg han til.

Tar ikkje lett på oppgåva
Os ligg på 8. plass på tabellen med 6 poeng på 6 kampar. Sundag klokka 16.30 møter dei NHHI i Oshallen, ein motstandar som ligg på 10. plass med 4 poeng på 8 kampar.

- Vi tar ikkje lett på oppgåva i morgon. NHHI har mange tap, men prestasjonane deira svingar veldig. Dei tapte 33-16 i for Årstad 2 i førre kamp, men hamna berre fire mål bak Stord kampen før.

Teiper seg saman
Husebø fortel at han stiller med fullt mannskap.

- Vi har litt tynn stall og nokre fingrar som er skadde, men teipar oss saman og går for siger i morgon, seier han.

Etter damekampen er det ny kamp, då har jenter 16 sin sesongdebut når dei møter Kjøkkelvik klokka 17.50.