Vil ta ansvar for Steindalssætra

Steindalssætra er eigd og driven av Os Ungdomslag, men den noveranda eigaren slit med rekrutteringa og har ikkje kapasitet til aleine å ta vare på den gamle hytta. Difor har dei hatt samtaler med turlaget for å sjå på moglegheiter til å få hytta i stand igjen. Blant anna har brannvesenet ilagt fyringsforbod.

I samband med samarbeidet innkaller Os Turlag til ekstraordinært årsmøte torsdag til veka, kor overtakelse av Steindalssætra står på dagsorden.

– Os Turlag ønsker gå inn som majoritetseigar i Steindalssætra, og drifta hytta i lag med Os Ungdomslag. Vi ønsker også å reparera og oppgradera hytta, slik at den er i teneleg stand, heiter det i innkallinga.

Oppgradering til 260 000 kroner

Turlaget har henta inn eit overslag på tinga som må gjerast i hytta for å få den i teneleg stand.

– Me har fått eit prisoverslag der kostnadane er berekna til 260 000 kroner inklusive materialer og arbeidspenger. Viss me klarar å gjera ein del av arbeidet på dugnad, så kan denne summen reduserast eindel, heiter det i saksframlegget.

Blant tinga som må gjerast er bytting av pipa, ny omn på kjøkenet, brannveggar og brannsikkert underlag framfor peisen og rømningsveg frå hemsen.

– Utan eldstader, så kan ikkje hytta brukast. I tillegg så vil hytta forfalla utan regelmessig varme frå ovnane og peisen. Difor er det viktig å få ordna hytta så raskt som råd.

Turlaget ser for seg at drift av hytta kan finansierast gjennom utleige og ulike støtteordningar. I sakspapira til årsmøtet kjem det fram at dei vil aventera hytta gjennom DNT-systemet og på den måten få hytta enno meire i bruk.

Overtakinga må godkjennast av grunneigaren.

Om Steindalssætra

Steindalssætra er ei hytte som ligg midt i Steindalen, 1 1⁄2 km gange frå parkeringsplassen på Midtsæter. Hytta ligg ideelt til i ein lysning i skogen, like ved ein liten bekk.

Hytta vart opprinneleg bygd i 1813, og brukt som sel. I 1939, så vart hytta gjeven i gåve frå Nils Henriksen Bjånes, til Os Ungdomslag. Joh. Ludw. Mowinckel hjelpte til med å finansiera oppussing av hytta. Sidan den gong har Os Ungdomslag dreve hytta.

Hytta er passeleg stor, og har ei stor stove, eit lite kjøkken og ein stor hems. Barnas Turlag i Os har vore 25 små og store i hytta, og det hadde nok vore plass til fleire om naudsynt. I tillegg er det plass til å setta opp lavvoar, telt eller liknande utanfor hytta.

Gudrun Heggland skriv om Steindalssætra i boka «På mjuke stiar og flotte fjell i Os»:

Seterdrift har det ikkje vore her i manns minne. Det er Os ungdomslag som eig hytta no. Steindalen har gjennom generasjonar vore ein utfartstad som har vore mykje nytta av ungdommane i Os.

I krigsåra vart Steindalen brukt på så mange måtar, i aprildagane i 1940 var det folk som flytta heimanfrå og la seg til i Steindalen inntil den kaotiske situasjonen vart avklara. Så var det folk som låg her på vedhogst for å skaffa brensel til vinteren.Og ungdomsflokkar drog til Steindalssætra for å dansa i ei tid då det ikkje var lov å ha vanlege dansekveldar i ungdomshusa.

Steindalen ligg midt i eit stort skog og fjellområde som ikkje er så lett å finna fram i for folk som ikkje er lokalkjende. I tillegg til Steindalssætra er det fleire hytter i Steindalen og i området omkring Krokvatnet, som ligg eit stykke sørvest for Steindalsvatnet. Dette villmarksområdet høvde svært godt til å stikka seg vekk i for folk som dreiv med illegalt arbeid i krigsåra, og i såmåte var det stor aktivitet her, særleg i dei første krigsåra. Motstandsfolk både frå Os og Bergen og andre stader møttest her, og gjorde avtalar og la planar. Ein sentral mann i dette var treskjeraren Jacob Hjelle, som hadde hytte i Steindalen.

Fiske etter aure

Den mest kjende av dei som låg i dekning i området var kommunistleiaren Peder Furubotn, som budde ei tid på Midtsæter og ei tid i Øvredalen. Tyskarane fann etter kvart ut kva som gjekk føre seg og gjekk til aksjon. Dei brende ned hytta til Jacob Hjelle og ei hytte som vart kalla Suez.