Viste breidde og arbeidsmoral

Bildeserie:

1 av 16

Onsdag spelte Os sin siste treningskamp før sesongstart i neste veke.

Kampen er den første på heimebane i vinter, og gjekk mot Varegg leiar av tidlegare assistenttrenar Ørjan Håland, og mot tidlegare lagkamerat Skage Simonsen Lehland.

Varegg slo Os i begge seriekampane i 2017 (2-0 og 2-1) og 2016 (3-1 i begge).

I dag ville det ikkje vore urettvist med siger til Os.

Os - Varegg 2-2 (1-1)
Målskårarar, Os: Alexander Dale og Fabian Bødtker.
Os: Frode Moberg Øvredal - Alexander Dale, Divaldo Cardoso, Torkel Hjertnes - Endre Brenne, Rafael Villén, Marius Mikkelsen, Harry Moore - Torgeir Lunde, Steffen Ljosheim - Øystein Takle Eide.
Innbytarar med speletid: Fabian Bødtker, Vegard Strønen Skeie, Håkon Kvittingen, Simon Moberg Søvik, Joakim Kvernes Forstrønen, Steffen Kvamsdal, Kristoffer Røttingen og Anders Havsgård.

Varegg leia 1-0 og 2-1. Begge måla blei skåra av erfarne Thomas Ulvestad Vacas, begge på lange lobbar frå høgresida av Os-målet over keeper og i lengste hjørne.

Os måtte klara seg utan Mats Cato Moldskred, Christoffer Hafsås og Frode Storebø, men brukte 19 spelarar og viste høg arbeidsmoral frå start til slutt.

– Vi trudde vi måtte klara oss utan Dale og Mikkelsen òg, men dei friskmeldte seg sjølv før kampstart, fortel Os-trenar Karl Kvile.

Dei største sjansane

Varegg tok leiinga i 18. minutt, Os utlikna i 43. minutt. Gjestane gjekk i føringa igjen 6 minutt ut i 2. omgang, Os utlikna for andre gong i 77. minutt.

Os kom til mange innlegg i løpet av kampen, Brenne åleine hadde 6-7 innlegg før han i 30. minutt måtte ut grunna ein liten skade i hovudet etter eit fall. Ljosheim kom til eit par innlegg frå motsett side og Villén avslutta på måltaket frå grei distanse.

Den største sjansen i første omgang var Fabian Bødtker sitt skot, som keeper var på, men som gjekk forbi. Varegg-keeperen fekk snudd seg, jogga etter ballen og aust den ut til corner.

I andre omgang hadde Os nokre småsjansar før 1-2-målet. Seinare hadde dei ei heading i tverrligger, nokre innlegg som blei heada over og eit par frispark i farleg posisjon.

I 85. minutt kom Joakim Kvernes Forstrønen seg forbi og storma i høg fart nesten frå midtbanen og inn mot møtande keeper. Debutanten kunne nok fint passert keeper og skåra, men valte å legga inn til Bødtker og Ljosheim, som var på løp. Innlegget blei hardt og noko upresist.

– Eg blei veldig glad då eg blei tatt med i troppen for første gong, og prøvde å gripa sjansen. Kvile hadde gira oss godt opp i garderoben før kamp. Eg følte at eg fekk til ein del, men i denne situasjonen burde eg tatt eit anna val. Eg såg at Steffen var på løp og bestemte meg tidleg for å legga inn. Eg ser i ettertid at eg burde skote eller prøvd å passera keeper, seier Forstrønen.

– Os var klart best

Kvile er ikkje nøgd med måla Os sleppte inn, men med både innsats og prestasjonane.

– Presspelet fungerer, vi trykker til og eg synest alle klarer seg bra, både dei som starta og dei som kom innpå. Eg meiner vi er best i begge omgangane og samla sett klart betre enn Varegg.

Varegg-trenar Ørjan Håland synest ikkje det var nokre lag som var tydeleg best.

– Begge lag har sine periodar, men eg synest Os ser veldig bra ut, og dei vil nok få ein gøy sesong med den troppen dei har.

Også Håland brukte i alt 18 spelarar. Han meiner Os, særleg mot slutten, viste kor langt dei har kome i utviklinga av eigne spelarar, slik ungdomane framsto.

– For vår del spelte vi nok med det som er vår beste start-ellevar i dag, og det er første gong dei spelte saman. Det blei litt få løp og initativ framfor ballførar, noko som gjorde at ballen gjekk litt mykje heim igjen. Samla sett blei det ein litt rotete kamp, men eg ser kva vi har å jobba med før vi om ei veke skal spela NM-kvalik borte mot Trott.

Os speler òg NM-kvalik om ei veke, den går borte mot Stord.