Wild Emergenzafinale

Den nye Bergensbølgen inntek UFS Verftet laurdag kveld når finalen i Emergenza blir arrangert. I sjangrar frå bluesrock, akustisk og hiphop til thrashmetal, hardrock og punk finn vi ekstremmetallgutta i Neoplasma.

– Dei speler på eit sykt høgt nivå. Vi andre som leikar oss her i kjelleren når dei knapt til knærna, skryt Kjetil Osablod Grønvigh i Os Rockeklubb.

Målet var finalen

Neoplasma har vore gjennom to innleiande runder på Garage.

– Målet var å koma seg til finalen på Verftet.

– Dei to rundane på Garage var fantastisk gøy med utruleg god stemning, fortel trommis Ivan Rolstad.

Fekk telefon

Gutene var 6 - 7 publikumsstemmer frå å gå direkte til finalen, men fekk wildcard frå juryen.

– Det kom ein telefon eit par dagar etter semifinalen med beskjed om at vi berre hadde å stille på Verftet.

– Det var ein dritgøy telefon å få. Det var jo det som var målet vårt.

Siktar høgare

Vinnaren frå Verftet går vidare til den norske finalen, kor ein profesjonell jury plukkar ut det bandet som skal representere Noreg i den nordiske finalen.

– Når vi no har kome oss til Bergensfinalen, så må vi setje nye mål.

– Det må sjølvsagt vera å kome til den norske finalen. Skal vi klara det, så treng vi hjelp frå publikum.

– Osingane må berre koma seg på verftet i morgon kveld. Vi går på klokka 1830, reklamerar gitarist Christer Havsgård.

Neoplasma spelar eit sett på fire låtar i finalen. Desse er med i Neoplasma: Christer Havsgård (gitar), Ivan Rolstad (trommer), Martin Aarland (gitar), Jørgen Omre Larsen (bass), Patrick Gaassand (vokal)