Fylkesdirektøren sitt framlegg om å leggje ned TAF/YSK-tilbodet ved Fusa vidaregåande skule er heilt feil veg å gå.

Dette handlar ikkje berre om ei utdanningslinje. Dette handlar om framtida til ungdomane våre og næringslivet i regionen.

Administrasjonen i fylket har no lagt fram ei sak som skal opp i Yrkesopplæringsnemda 10.11 og vidare i Hovudutval for opplæring, kompetanse og tannhelse den 17.11

I sakspapira til desse møta argumenterer ein for gradvis utfasing av TAF/YSK tilbodet. I tabell for endring av tilbodet i Stor-Bergen ser ein at det vert trekt klassar for TAF/YSK helse og omsorg, akvakultur og tekniske fag ved Fusa vgs.

Fusa vgs er svært dyktige på samarbeid mellom skule og næringslivet rundt.

Dei samarbeider no og har lærlingar i 12 bedrifter innanfor akvakultur og 14 innan tekniske fag i heile regionen. Innanfor helse er dei lærling-leverandørar til kommunane Bjørnafjorden, Samnanger, Tysnes, Kvam og Kvinnherad.

Helsesektoren er stadig i mangel på folk, her leverar Fusa vgs lokalt tilknytte framtidig tilsette til kommunane rundt.

Geografisk har skulen TAF/YSK-elevar i praksis frå Odda til Tysnes!

Frå bedriftene får vi høyre at Fusa Vgs leverer den kompetansen dei treng, og at samarbeidet er svært godt. Når dei ser endring i framtidige kompetansebehov syter dei saman med skulen for at desse vert dekka i opplæringa, ein vinn-vinn-situasjon for bedriftene og ungdommane/skulen.

• Kva kostar det når ungdom må reise lenger, flytte heimanfrå eller velje vekk ei utdanning dei eigentleg er motiverte for?
• Kva kostar det for lokale bedrifter som treng fagfolk, at ungdommane ikkje er der?
• Og kva kostar det for Fusa og kringliggjande bygder når viktige tilbod vert sentraliserte bort?

For mange ungdomar er nærleik til skulen avgjerande.

Eit godt skuletilbod i nærmiljøet gjer det mogleg å bu heime, halde på fritidsaktivitetar og vere ein del av lokalsamfunnet medan ein tek vidaregåande opplæring.

Det gir tryggleik, tilhøyrsle og betre føresetnader for å fullføre. I ei tid då vi veit kor viktig det er å førebyggje fråfall, bør svaret vere fleire fleksible og praktiske opplæringsløp – ikkje færre.

Bodskapen vår er klar: Ikkje legg ned TAF/YSK ved Fusa vidaregåande skule. Behald og vidareutvikle tilbodet – for ungdomane, næringslivet og framtida til regionen vår.

Bjørnafjorden Senterparti
Kvam Senterparti
Samnanger Senterparti
Tysnes Senterparti
Kvinnherad Senterparti