Avskilta bil som ikkje hadde skilt

Måndag i 09.30-tida fekk politiet tips om bil utan skilt.

– Bilen var ikkje avskilta frå før, kvifor bilen var utan kjenneteikn står det ikkje noko om i rapporten, seier politioverbetjent Anne Lyssand.

– Men den blei formelt avskilta i går, sjølv om det ikkje var skilt å plukka av. Bilen var ikkje forsikra, og bilførar blei meldt for dette.

Promilletest av bilførar, som er i 40-åra, gav ikkje utslag. Vedkomande blei likevel tatt med for blodprøvetaking. Det blei ikkje tatt beslag i førarkortet hans.

• Les òg: Tok to fartssyndarar på skuleveg

Mann i 30-åra utan lappen

I 12-13-tida i går blei ein bilist kontrollert ved Amfisenteret.

Vedkomande, ein mann i 30-åra, har ikkje førarkort, og blir meldt for dette.

Meldte seg etter ruteknusing

Klokka 19.13 måndag kveld fekk politiet melding om ruteknusing på Os terminal. Ein tenåring over ungdomsskulealder blei observert løpande frå staden.

– I 22.30-tida ringte han til oss, og innrømte å ha knust ruta. Han forklarte at det var eit uhell, og sa at foreldra ville kontakta huseigar (kommunen) for å erstatta den knuste ruta.

– Dette synest vi er flott gjort, både av ungdomen og foreldra, seier Lyssand.