Basketak på ungdomsfest

Fredag i 23.30-tida blei det meldt om amper stemning mellom nokre ungdomar ved eit festlokale nær Os sentrum.

– Krangelen var mellom nokre ubudne gjestar, og nokre tenåringsjenter skal ha vore involvert i eit basketak, fortel politioverbetjent Christine Grindstein.

– Då patruljen kom til staden var basketaket over. Ingen ønskte å melda noko og ingen var fysisk skadd. Patruljen blei verande på staden for å forebygga yttarlegare konflikt.

To menn i klinsj

Tidlegare på kvelden, i 20.30-tida, kom det melding om ordensforstyrrelse på ei privat adresse.

– Ein mann i 60-åra og ein mann i 30-åra var involvert. Mannen i 30-åra fekk pålegg om ikkje å oppsøka den andre mannen, eit pålegg som gjeld fram til klokka 08 laurdag.

Reagerte på fotografering

Fredag formiddag i 10.30-tida fekk ein huseigar i Hjortestien melding frå ein nabo.

Naboen hadde observert at ein bil hadde køyrd opp på tunet hans og tatt bilde av huset.

– Det er ingen kjent årsak til bildetakinga. Politiet har ikkje sett noko til bilen eller mannen som tok bilder, og det er heller ikkje kome inn meldingar om tilsvarande åtferd andre stadar i distriktet, seier Grindstein.