Tydeleg tilbakemelding frå «usynlege» syklistar

Måndag klokka 20.21 blei politiet oppringt av ein mann som hadde køyrd på Hatvikvegen retning ferjekaien.

– Han hadde hatt ei nestenulykke då han tok igjen to gutar som såg ut til å vera i 12-årsalderen. Dei sykla, men utan refleks, og var vanskelege å sjå i mørket, fortel politioverbetjent Anne Lyssand.

Då bilisten stoppa og prata med dei, for å fortelja kor vanskeleg dei var å sjå, skal han ha fått ei tydeleg tilbakemelding; «hald kjeften på deg!».

– Dei to unge syklistane skal ha køyrd inn på ferja. Bilisten ville vi skulle møta dei med ein patrulje på Venjaneset, for å oppmoda dei om bruk av lys og refleks, men det skal ikkje ha vore ledig kapasitet.