- 10. nov. 2020

Denne gjengen garanterer cupfinale

Det nye e-laget til Os Fotball sparer ikkje på krutet når det gjeld ambisjonar.

Det nye e-laget til Os Fotball førebur seg i desse dagar til NM-kvalik. Frå venstre: Marius Andersen, Aleksander Grotle, Tommy Wold Gjelsvik og Oliver Linde. (Foto: Ørjan Håland)
Ørjan Håland
Ørjan Hålandtirsdag 10. nov. 2020 09:55

I går var den første fellestreninga til Os Fotball sitt nye e-lag.

– No har vi fire spelarar som skal representera Os i e-fotball. Desse fire held eit svært godt nivå, og dette blir ein god start på den nye satsinga vår, seier Rune Mo.

Det var i oktober at klubben starta opp og inviterte til laguttak.

– Det første som skjer er at dei skal kvalifisera seg til NM. Då kjem dei til å nytta seg av klubbhuset for å trena saman og førebu seg til denne kvaliken.

Online NM

Grunna korona vil det ikkje bli ei felles samling under årets NM.

– I år vil alt av kvalik og sjølve NM gå online. Dette er det vi skal øva på no, difor sit dei med kvar sin maskin og kvar sin skjerm for å få det mest mogleg likt, forklarer Mo.

Det nye e-laget er godt i gang med treninga. (Foto: ØH)

– Gøy satsing

Spelarane sjølv er svært nøgd med den lokale fotballklubben sin nye satsing.

– Det er veldig kult av klubben å starta denne satsinga, frå ein til ti må eg vel seia at dette ligg godt oppe på åtte-ni-talet.

– Sjølv om vi nok ikkje kjem til å dra så mykje damer med dette, er det populært blant gutta, seier ein nøgd Tommy Wold Gjelsvik.

Det ser ut som Liverpool er eit populært valg på FIFA. (Foto: ØH)

35 timar FIFA i veka

Det nye e-laget til Os Fotball skal trena saman i klubbhuset to dagar i veka. Men det blir lagt ned mykje egentrening i tillegg.

– Det blir sosialt og kjekt å møtast til fellestreninger her på Kuventræ, men det er ikkje nok til å bli betre. Vi spelar nok alle saman minimum 4-5 timar FIFA kvar dag, påpeikar Tommy.

Samtlege på laget har sjølv spelarerfaring i fotball, men på litt lågare nivå enn A-laget til Os.

– Eg har spelt i gamle 3. divisjon og ein del i 4. divisjon. Eg trur det er ein fordel å ha spelt fotball, det er mykje som handlar om fotballforståing, og det må du ha i FIFA òg, seier veteranen på e-laget, Marius Andersen.

Garanterer NM-finale

Det skal visa seg at Os Fotball sit på to veldig gode e-spelarar.

– Det har allereie vore ei onlineturnering, der blandt anna Brann sitt e-lag stilte, kor Tommy knuste alle saman, seier Aleksander Grotle.

Tommy sjølv sparer ikkje på krutet når det kjem til ambisjonar.

– Eg har til gode å tapa ei turnering, og kan lova deg éin ting Rune Mo; vi skal til Ullevaal! Det kan eg sverga på, seier Tommy bastant.

Tommy Wold Gjelsvik er tydeleg på at Os Fotball skal nå langt under årets NM i e-sport. (Foto: ØH)

Bli medlem du også!

Di støtte gir liv til lokalavisa vår.

  • Tilgang til alt innhald
  • For heile familien (6 pers)
  • Utan bindingstid
  • Berre 30 kr per veke
Teikna abonnement

Abonnementet blir fornya kvar 4. veke for kr 120 per månad. Du kan seia opp kor tid du vil, og blir då ikkje belasta for neste periode.