Det var ledige vaksinetimar frå før - men «alle» ville på ekstranummeret

Onsdag for ei veke sidan fekk Bjørnafjorden kommune melding om at dei ville få 480 hetteglas i veka vi no er inne i.

Dette er om lag dobbelt så mange dosar som først venta.

Bjørnafjorden kommune får framleis vaksine utelukkande frå Pfizer.

Les ògFår ein haug med ekstradosar neste veke

Kommuneoverlege Jonas Nordvik Dale opplyste om fleire ledige timar, og oppmoda folk over 18 år å melda seg på.

Han var spent.

Frå før var det nemleg 20 ledige timar onsdag og nesten 100 ledige fredag.

Og no kom det over tusen dosar ekstra.

– Responsen har vore veldig god. Sjølv om mange er vaksinerte, og det sikkert er fleire som er på tur i ferien, har over 250 innbyggarar bestilt time etter at vi gav beskjed om ekstradosane.

Trass god respons reduserte kommunen timemengda noko, dei såg at det ikkje blei behov for alle dei 2.800 dosane. Men desse gir påfyll til vekene som kjem, om det blir behov.

– Vi kan lagra dosane i inntil ein månad i kjøleskap, men ønskjer jo å få vaksinert flest mogleg - og å ikkje sitja med så stort lager, seier Dale.

Per i dag ligg det an til at 837 får dose 1 i morgon og 573 får dose 1 på fredag.

1.400 dosar hamnar uansett på kjøl.

– Det har vore nokre ubrukte dosar på kjøl dei siste vekene, men dette er første gong med over hundre.

Det er framleis ledige timar både til i morgon og fredag.

– Om du har ein dag og kanskje eit klokkeslett som passar veldig godt, men ikkje finn ledig time, så ring vaksinetelefonen vår!

Kommunen gjekk i sommar er over til nytt system, med timebestilling fram til 20. august, i staden for å invitera frå veke til veke.

– Er det fullbooka i nokre av vekene som kjem?

– Nei. Vi har grei bestilling, men folk har alle datoane å velja mellom.

– Veit du kva som skjer etter 20. august?

– Nei. Vi veit ikkje noko om mengde, eller kor tid vi eventuelt byrjar på dei under 18 år. Pfizer er jo godkjent ned til 12 år.

– Noko av det første vi vil diskutera over ferien er nok drift, bemanning og opningstider på koronalegevakt og teststasjonane. Så blir det spennande å sjå om programmet for dose 2 går som planlagt, eller om nye prioriteringar kjem inn, for eksempel på dose 1 til dei under 18.