– Dette hjelper oss ingenting

I juli i fjor kom ei ny forskrift som regulerer kjøring med vassjet. I august sa vassjetimportør Carl Jacob Johansen at han garanterte at forbodet vil synka som ein stein.

I oktober skreiv EFTA sitt overvåkingsorgan, ESA, at det norske forbodet er i strid med EØS-reglane.

Tysdag 15. januar sendte Miljøverndepartementet ei regelendring ut på høyring (regjeringen.no).

Endringa som er på høyring seier i hovudsak dette:
• Endring i småbåtlova paragraf 40 blir endra så forbodet mot bruk av vassjet og liknande blir oppheva.
• Det blir framleis forbode å kjøra vassjet nærmare enn 400 meter land (500 meter i innsjø).
• Øyer større enn 200 kvm tel som land.
• Det blir også forbode å kjøra vassjet i verneområde.
• Det blir lov å kjøra i forbodssone ut til lovleg sone, men ikkje i høgare fart enn 5 knop.

– Det er eit steg i rett retning at dei vil fjerna forbodet, men med desse reglane ser det ut som eit forsøk på å villeia ESA.

– I praksis så er vi med desse endringane like langt. 400 meter frå land og nærmaste holme er langt, seier Carl Jacob Johansen i Jettrade.

Det norske høyringsutkastet baserer seg i stor grad på dansk regelverk, men har auka avstanden frå land frå danske 300 meter til 400 meter.

– I Danmark har det ikkje så mykje å seia, dei har ikkje skjergard. I Noreg, med heile 400 meter frå land, må du mange stadar kjøra i 5 knop til du er ute på havet.

– I tillegg er ikkje det danske regelverket mykje til forbilde, lovverket er framleis i strid med EU-lovgjevinga og eg kjenner til at den skal ankast inn for EU-kommisjonen i morgon.

Johansen kjempar for å få vassjet behandla på lik linje som båt, og engasjerer seg i ei sak mot ein annan vassjetkjørar, ei sak av høg prinsipiell verdi, som skal opp i Agder Lagmannsrett.

– Vassjet = båt

– Eg har vore i fleire møte med MD. Nokre kompromiss er vi førebudd på å inngå, at den såkalla vassjeten må vera CE-merka og at bus-kjøring (rundt og rundt på same område) ikkje skal vera lov.

– Utover dette ser eg ikkje kvifor det staten kallar vassjet skal bli behandla annleis enn båt.

– Det finnest båtar som går fortare og støyar meir, nokre er store, nokre er små, nokre har til og med styre som ein scooter, seier Johansen.

Er fenderlista einaste forskjell?

Han legger ved to bilde, eitt som viser ein 2012-modell 12 fot SeaDoo med 4-takts motor, som er best i klassen i forhold til alle båtar når det gjeld utslepp, støy og miljøomsyn generelt. Den andre er ein 8 fot Avon, same type "båt", men med litt større fenderlist.

– Som båtkonstruktør Eivind Amble (Windy) seier, så er det ikkje snakk om definisjon på båt eller vannscooter, men på kor stor fenderlista skal vera, og om den eventuelt skal innehalde luft.