Direktebussen til Haukeland sjukehus forsvinn

Bybanelinje 2 opnar 21. november.

For Os sin del har endringar stort sett skjedd allereie, i samband med E39-opninga.

– Éi endring påverkar likevel Os-området, opplyser pressekontakt i Skyss Øyvind Strømmen.

Bussruta 604, som har fire daglege avgangar mellom Osøyro og Haukeland sjukehus, vil no forsvinna.

Neste veke, måndag 21. november, vil denne ruta bli erstatta av eit buss- og bybanetilbod med hyppigare avgangar.

Med 600-bussen og byte til bybane ved Kristianborg vil reisetida frå Osøyro til den nye bybanestasjonen ved sjukehuset vera rundt 44 minutt.

Det kan vera litt kortare og lengre reisetid, avhengig av avgang.

604-bussen i dag tar 48 minutt til busstoppet ved sjukehuset.

– Når ein tek i betraktning gangavstand og at sjukehusområdet er stort, vil nok nokre oppleva litt lengre reisetid, medan andre vil få litt kortare, men store skilnader vert det ikkje.

Reisande langs Byvegen kan ta 610-bussen til Nesttun og frå Nesttun byta til den utvida linje 20 når dei skal til Haukeland.