Stian Dyngeland, her då han skåra i NM-runde mot Haugesund for Lysekloster i 2018, er no Os-spelar. (Foto: Andris Hamre)

Dyngeland har signert med Os

Tidlegare angripar for Lysekloster og Fana speler på Kuventræ ut 2020.

Av: Kjetil Vasby Bruarøy

Stian Lønne Dyngeland går frå Fram til Os. Han gjekk i 2018 frå Lysekloster til 2. divisjonsklubben Fram i Larvik midt i sesongen, for å gå politihøgskule.

Dyngeland fekk 10 kampar i 2. divisjon i fjor haust og 10 på vårsesongen i år før han flytta til Vestlandet.

– Vi fekk høyra at han var på veg til Vestlandet igjen, og har halde dialogen gjennom sommaren. I går signerte vi kontrakt ut 2020, fortel dagleg leiar og hovudtrenar for Os, Endre Brenne.

Han skildrar Dyngeland som ein erfaren, offensiv og energisk angrepsspelar. Den nye spissen til Os spelte 14 kampar for Sogndal sitt A-lag i 2012 og 18-21 kampar i året for Fana frå 2014 til 2016.

– Er vi heldige får vi han speleklar til måndagens heimekamp mot Brann 2, seier Brenne.

I 2017 skåra Dyngeland 4 mål på 11 kampar for Lysekloster, på vårsesongen i fjor blei det 2 mål på 8 kampar. For Fram i 2. divisjon blei det 1 nettkjenning både hausten 2018 og våren 2019.

– Eit godt overgangsvindauge

Tidlegare i august har Os signert Espen Haraldseid og Andreas Støle-Hansen frå Haugesund 2 sin stall. Begge debuterte borte mot Strømsgodset 2 førre helg.

– Det var meir enn godkjent, seier Brenne, som brukte dei to backane som midtstoppar og kant i ein kamp med stor forfall, men med betre gjennomføring enn i dei siste heimekampane.

Årsaka til at Os har styrka stallen i sommar er at dei i vår gjekk inn i sesongen med ein noko tynn stall.

– I tillegg blei både Øystein Takle Eide og Alexander Dale skadd. Frode Storebø var det tidleg klart at vi ikkje fekk bruka like mykje som før.

– Men no er både Storebø og Dale i trening igjen, og veka vi har lagt bak oss har kanskje vore årets beste treningsveke. Friskt blod hjelper heile gruppa, vi har dessutan fått konkurransesituasjonen vi ønskjer, oppsummerer Os-trenaren.

 

Fleire saker