– Eg treng Toyotaen til neste løp

Etter to sesongar med bilcross kjører Karoline Breivik (18) frå Os i år sin første heile sesong med rallycross.

I helga kjørte ho fjerde av fem NM-rundar for junior og landa på 3. plass i B-finalen, totalt 7. plass av 10 kjørarar.

– Han som vann har hatt NM-rundar det han berre har kjørt eitt heat. Eg fullførte alle og fekk nok poeng til at eg framleis ligg på 2. plass samanlagt.

– Men det er tett bak meg og eg vil jobba hardt for ikkje å mista pallplass i siste NM-runde, seier Karoline til Midtsiden.

– Motoren kom torsdag

Karoline har berre fått bruka den nye rallycrossbilen sin, ein Toyota Starlet, i første NM-runde.

I dei tre neste har ho kjørt ein leigd Peugeot som ikkje er like rask. Ho tok 2. plass i andre NM-runde, med den lånte bilen, men håper likevel å få Toyotaen klar til bruk til siste runde, som går på Gardermoen om to veker.

– Banen på Gardermoen har fleire langstrekk og då blir det ekstra vanskeleg for meg, sidan dei fleste andre har raskare bilar enn meg.

– Men torsdag blei motoren til Toyotaen levert, og viss eg er heldig er bilen klar til testkjøring på Eikås til helga og til siste NM-runde helga etter.