Dagens målskårarar, f.v.: Elias Myrlid, Christoffer Hafsås og Mats Cato Moldskred. (Foto: Os Fotball)

Elias Myrlid skåra i debuten då Os slo Telavåg

I går fekk Os opprykket «gratis», i dag tøffa dei seg borte på graset til Telavåg.

Av: Kjetil Vasby Bruarøy

Denne helga blir tredje siste runde i 4. divisjon spelt, og med Lyngbø sitt tap for Frøya fredag kveld var Os sikra opprykk allereie før kampstart borte mot Telavåg i dag.

Os leia 0-2, blei henta inn igjen til 2-2 rett etter pause, men vann komfortabelt 2-5.

– Vi hadde full kontroll frå start og burde i grunnen ha skåra eit par mål til. Men så sovna vi på dekk og fekk 1-2 imot før pause. Spelarane vakna i grunnen ikkje igjen før i 60. minutt, men då var vi tilbake for fullt, seier trenar Tim Henrik Sperrevik.

– Vi er ikkje så vant med å spela på gras som før, og Telavåg kjempar om å halda seg i divisjonen. Men på slutten av kampen såg dei ut til å slita meir enn oss, dei falt for eige gras, oppsummerer Os-trenaren.

– Ein god prestasjon av begge

Mats Cato Moldskred og Christoffer Hafsås skåra to mål kvar. I 84. minutt sto det 2-4.

– Vi har litt folk ute med skadar, og Os 2 har ein viktig kamp i morgon, så i dag fekk nokre ungdomar lov å prøva seg litt.

Forsvarsspelar Trym Hjørnevik, som har hatt ein innhopp tidlegare, spelte sin første frå start. Elias Heggland Myrlid kom innpå siste kvarteret og sette inn 2-5-målet til Os i 84. minutt.

• Les òg: Elias på kretslaget (2016)

– Vi fekk ei kontring og Mats Cato tok med seg ballen i høg fart. På motsett side kom Elias og bra tempo. Moldskred kunne nok ha forsøkt seg sjølv, men la fint over til Myrlid, som sette inn kampens siste mål innanfor lengste stolpe. Ein god prestasjon av begge! synest Sperrevik.

– Eg trudde Mats Cato skulle skyta

Elias, som fylte 16 år i sommar, Trener og speler normalt med Os 2, men har òg hatt nokre kampar med junior- og gutelag denne sesongen. For Os 2 har det blitt 4 nettkjenningar til no.

– Det var veldig spesielt å få koma innpå i dag, med høgare tempo og tøffare duellar enn eg er vant med. Men eg er veldig glad for at eg fekk sjansen! seier Elias til Midtsiden.

Om skåringa seier han dette:

– Eg trudde Mats Cato skulle skåra sjølv, så eg fekk litt rom. Då var pasning rett val, og det såg han. Heldigvis!

Os stilte med følgjande startellevar: Chris Sunde Midtun - Anders Havsgård, Torkel Hjertnes, Simon M. Søvik, Trym Hjørnevik - Håkon Kvittingen, Øystein Takle Eide, Kristoffer Røttingen - Sander Kvittingen, Mats Cato Moldskred og Christoffer Hafsås.

Innbytarar med speletid: Vegard Strønen Skeie, Endre Brenne, Erik Kanestrøm og Elias Heggland Myrlid.

Os speler neste kamp laurdag 13. oktober, heime mot Frøya på 4. plass. Dette er sesongens siste heimekamp.

Os leiar no tabellen med 10 poeng meir enn Lyngbø, og har skåra 79 mål på 20 kampar (så godt som 4 mål per kamp).

Fleire saker