«Sauna på rek» skriv Os & Fusaposten, og viser til NyttiOs.
Os Sauna, som kom i drift vesle julaftan, har vore fullbooka fleire økter i dag, og dei som heldt varmen frå klokka 13 til 15 fekk problem med å koma seg i land i 14.50-tida.
Saunaen er festa i to lodd retning bubilparkeringa, og ville uansett ikkje ha hamna på noko seglas.
Men dei to lodda motsett veg har ikkje kome på plass. I staden var det ei midlertidig løysing med fortøying i brygga, og det var minst eitt av desse som hadde svikta.
– Dei som var i saunaen kontakta meg, og ein annan i gjengen hadde ringt ein kamerat i brannvesenet, fortel dagleg leiar i Os Turn, Marita Haugland.
Brannvesenet rykte ut og taua saunaen tettare på brygga. Så kom Samba Marin for å festa den igjen.
– Dei som var ute dagen før opning rakk ikkje få ut dei to siste lodda, så då blei det denne midlertidige løysinga nokre dagar, seier Eirik Haugland, dagleg leiar i Samba Marin.
– Dei to siste lodda kjem ut i morgon, supplerer kollega Jon Oskar Døsen.
Det var fleire som skulle i badstove klokka 15, mens ny, midlertidig fortøying kom på plass.
– Dei måtte vi dessverre kansellera, men dei får både refundert pengane sine og ei ekstra økt gratis, som kompensasjon, seier Marita.
– Blei episoden opplevd som dramatisk?
– Nei. Eg snakka to gongar med dei om bord, og dei tok det med ro.
I saunaen er det både varme og vatn, den er 15 tonn tung og det var berre to av fire feste som var av.
– Vi beklagar at dette skjedde, og er takksame for den raske hjelpa. Det var nye gjestar som kom på kvelden, og godt vi fekk den raskt i drift igjen.
