Fiskar etter nye eigarar

Mange gledde seg over at Turid Leikvoll Hjelle og Veronika K. Engevik i 2005 starta Fisketorget Os, Os sentrum var berre halvannan månad utan fersk fisk i lokalet der familien Lepsøe hadde selt fisk sidan 1946.

Men i januar 2014 kan det vera slutt, om ikkje Turid Leikvoll Hjelle, som dei siste åra har eigd bedrifta åleine, finn nye eigarar.

– Det bør vera godt grunnlag for å driva butikken vidare, kanskje med nokre investeringar og endringar, seier Turid.

– Eg har nokre fantastiske tilsette som har takka nei til å overta verksemda, men som gjerne jobbar vidare under nye eigarar.

Litt nedgang

Fisketorget Os AS omsette for over 4,9 millionar kroner og gjekk med over 160.000 kroner i overskot i 2011.

– Lettsalta torsk, aurefilet, fiskekaker og salatbaren vår har vore blant det mest populære.

I 2012 var omsetnaden knappe 4,2 millionar kroner og resultatet 84.000 i minus.

– Eg legg ikkje ned fordi eg må, men fordi eg føler at Fisketorget treng nye krefter for å ta dei grepa som skal til for å løfta butikken over på plussida igjen.

– Cateringverksemda har vore stabil, men salet i butikken har gått noko ned. Årsakene er kanskje fleire, trur Turid, og nemner trafikk som eksempel.

– Vi fekk ei markant endring då det blei forbode å kjøra inn frå Hatvikvegen til Brugata, eg er glad for at den vegen opna igjen.

Kjøtt og kafé?

At den andre ferskvareforretninga, den tradisjonsrike butikken Kleiven Kjøtt og Delikatesse, i 2011 la ned, er også noko som kan ha hatt negativ verknad.

– Mange av kundane våre kom med ein pose med varer frå Kleiven i handa. Det var nok positivt å ha to ferskvareforretningar nesten vegg i vegg.

Samtidig kunne kjøtt blitt ei tilleggsvare hos Fisketorget.

– Fleire har kome med forslag om at vi skal utvida til også å selja kjøtt.

– Nokre meiner at vi også burde hatt stolar og bord, at vi kunne hatt kafé kombinert med butikk.

– Begge delar er sikkert gode idear, idear ein eventuell ny eigar kan ta med seg vidare.

Serverer ungdomen

Frå skulestart i august har Turid drive den nyopna kantina i Os ungdomsskule, som tilsett i Os kommune i 50 prosent stilling.

– Eg trivst godt på ungdomsskulen, men avgjerda om å selja eller legga ned Fisketorget kjem ikkje som følgje av denne nye jobben min, presiserer ho.

– Allereie i januar informerte eg dei tilsette om at eg vurderte å lata 2013 bli det siste året. Dei fekk tilbod om å overta drifta, noko dei takka nei til.

Dei to med lengst fartstid på Fisketorget, og med mat, er Ingrid Storenes, som har jobba for Lepsøe og seinare Hjelle, i til saman 22 år.

Laila Fjellberg hadde lang erfaring frå blant anna Matglede då ho blei rekruttert til Fisketorget av Turid og Veronika.

– Fisketorget er ein veldig fin arbeidsplass. Vi får håpe at nokon vil overta og at dei vil ha oss med vidare, seier Laila Fjellberg.

– Vi kjem uansett til å driva som før ut året, og kanskje litt inn i januar 2014, med same utval og alle spesialitetane vi plar ha fram mot jul, seier Turid Leikvoll Hjelle.