Fiskarar på Grønland utvikla ny Askeladden

Bildeserie:

1 av 8

I september lanserte Askeladden Boats eit nytt flaggskip, C83 med den banebrytande C-Command multifunksjonsteknologien.

Når båtmessa «Dra til sjøs» opnar i Sotra Arena torsdag i neste veke, blir Askeladden P60 Multi vist for første gong.

Mens førre nye modell frå Askeladden var inspirert av Tesla-bilane, er denne utvikla i samarbeid med fiskarar på Grønland.

– To kveitefiskarar og ein forhandlar på Grønland har vore del av utviklingsteamet. Vi har allereie levert 18 båtar til Grønland, fortel administrerande direktør Henrik Askvik.

– Båten vi sel på Grønland har blant anna klassifisering for å bryta is i 15 knop, den vi no lanserer er bygd på same format, men er 300 kilo lettare, men har mange av dei same eigenskapane.

På Grønland heiter båten JD 600 Qooca, oppkalt etter ei lokal legende. Namnet, som får ei litt anna betydning uttalt på norsk, blir heitande P60 her heime.

Høg fart med tung last

Askeladden P60 Multi har unike fortrinn innan lastekapasitet, fart og stabilitet.

Samanlikna med P66 Multi er denne bygd for større motor, inntil 350 hk, og med djupare V-botn (210) for mjukare gange.

– Vi hadde to tonn last og køyrde på ope hav i 40 knop. Det var ei spesiell oppleving, fortel Askvik, som sjølv har vore på Grønland i samband med utviklinga av den nye modellen.

– Når vi ser kor godt den er tilpassa jakt og fiske, trur vi at dette er ein båt også den nordiske marknaden kan ha nytte av. Vi har gjort den noko lettare, då dei færraste her heime har behov for å bryta is.

Når du vil skyta over vindskjermen

P60 er sett opp med sju ulike konfigurasjonar, med og utan vindskjerm/hardtop i full breidde framme, og med ulik plassering av ratt, gir og gass.

– Kundane veit sjølv best kvar dei vil sitja, kvar dei vil ha lasta si og korleis dei vil bruka båten.

– Men den er ikkje planlagt å ha ei tett og varm hytte, slik andre P-båtar har?

– Nei. Her er dekksplass prioritert. Fiskarane på Grønland opererer litt annleis enn her. Dei kaster gjerne opp ei presenning for å sova på dørken, dei vil heller ha sjanse til å strekka på beina om natta enn til å sitja lunt og godt mens dei køyrer.

Vindskjerm og hardtop ligg lågt. Det har ikkje berre med luftmotstand å gjera.

– Fleire av fiskarane driv òg med jakt. Dei ønskjer å kunna skyta kval og sel over vindskjermen, og bruker hardtopen som anlegg (støtte til olbogen) når dei skyt.

Til yrke og hobby

Innvendig fribordshøgde er 0,85 meter, noko som tilfredsstiller krava til yrkesbåtar under 15 meter. Båten kan registrerast i skipsregister og fiskeri-registrerast til yrkesbruk.

Askeladden P60 er CE-godkjent for dekkslast på 1.880 kg, men kan i praktisk bruk lastast med opptil 2.500 kg dekkslast og framleis gå på plan og yta rundt 38 knop med Suzuki DF300 APX.

– Det er ingen direkte parallell til denne båten i den nordiske marknaden, og vi føler oss trygge på at dette båtkonseptet vil treffa mange brukarar også i varmare strøk enn rundt Grønland.

Tekniske data:
Designkategori: C
Lengde: 6,0 m
Bredde: 2,6 m
Vekt utan motor: Ca. 1.200 kg
Drivstoff: 140 liter (opsjon ekstra tank med 3-veis ventil 140 liter)
Personar: Max. 10
Max. Last: 2.280 kg
Motor: Outboard 115 - 350 HK
Motorstamme: XL
Fartspotensial; +50 knop