– Gler meg på vegner av elevane

Få timar før tredje inntak torsdag var Os vgs blant dei som fekk tilbake påbyggklassen dei i utgangspunktet hadde mista.

Les ògOpprettar nye klassar før 3. inntaket

Nedre karaktergrense til påbygg til generell studiekompetanse ved Os vgs var 48,8 før dei fekk denne tilbake.

– Eg gler meg på vegner av elevane. Fleire av dei som ikkje kom inn var frustrerte, og mange av desse hadde veldig gode karakterar, seier rektor Johan Henrik Lassen.

Ventelistene ved skulen er lange, framleis er det 272 som ikkje har fått plass.

På påbygg er ventelista no nede i 21.

Nedre karaktergrense er redusert kraftig, frå 48,8 til 31. Snittkarakteren på dei 60 elevane som no har fått plass er sterke 4,5 (tilsvarande ca 45 karakterpoeng)

Måtte jakta på fleire tilsette og laga ny timeplan

Samtidig som han gler seg over at fleire elevar har fått plass, har rektor og resten av staben hatt travle timar frå onsdag for å gjera klart for nok ein klasse.

Plassen er knapp frå før. Påbygg-klasseromma er bygde om til andre fag, mens påbygg er flytta til D-blokka med anleggsteknikk. Det er leigd plass i Røde Kors-huset til tre andre klassar.

Les ògFår to nybygg i Kolskogheiane

I tillegg kjem hasteauking av bemanninga.

I dag er det berre ti dagar til skulestart.

– Vi har måtta tilsetja åtte ekstra til dette skuleåret, to av dei til denne påbyggklassen. Ein av dei to er ny, den andre har vi brukt som vikar før.

Samtidig måtte timeplanen, som var ferdig, lagast på nytt.

– Vi er nesten i mål. No manglar vi berre nokre norsktimar, dei må på plass seinast i morgon.

Stadig fleire som fullfører

Os vgs er nesten ein rein yrkesfagskule, men ligg langt over snittet for yrkesfagskular når det kjem til kor mange som fullfører og består.

Også samanlikna ved andre vidaregåande skular ligg dei nokre prosent over snittet.

– Det var 88 prosent i fjor og auka til 90 prosent ved endt skuleår før sommaren. Påbygg har normalt større fråfall, her ligg vi på 85 prosent, som også er veldig bra.