Goalgetter og forsvarsbauta signerte for damelaget

Os Fotball kan melda at damelaget til Os/Nore Neset forsterkar troppen i både angrep og forsvar. Angriparen Ingeborg Sundal Ljostveit (24) og forsvarspelaren Mariell Sivertsen (26) er klare for spel i gult og svart.

Ingeborg Sundal Ljostveit er ein målfarleg angripar frå Rosendal som står bokført med imponerande 44 mål på 36 kampar for moderklubben i 4. divisjon.

Ettersom Rosendal ikkje har damelag lenger, har den raske og sterke angriperen vore på jakt etter ny klubb.

– Eg ønskjar å spela med eit lag som er motiverte og der eg kan få utfordra meg meir som spelar, seier Ljostveit på Os Fotball si heimeside.

Mariell Sivertsen er ein duellsterk og tøff forsvarsspelar med gode leiareigenskapar.

Gode signeringar som passar perfekt

Hovudtrenar Ørjan Sandal er nøgd med sine to nye signeringar.

– Ingeborg og Mariell har glidd godt inn i spelargruppa frå første økt, og dette blir spelarar som passar perfekt for oss.

– Ingeborg er ein rask og sterk angripar med svært gode avslutningseigenskapar. Mariell er ein tøff og duellsterk forsvarsspelar som er flink til å ta ansvar og å kommunisera med dei rundt seg.

Os/Nore Neset har ikkje mista spelarar i vinter, men veteran Linda Johansen er skadd og mister heile årets sesong, og Vilde Drange Veglo gjekk som kjent til Sandviken før fjorårssesongen.

Skal kjempa om opprykk

Sandal er klar på kva som er ambisjonane.

– Vi skal kjempa om opprykk til 2. divisjon. Vi har fått ei flott gruppe som er godt vekta mellom ung og eldre.

– Det er sjølvsagt nokre tøffe utfordrarar til eit eventuelt opprykk, men det er bra at det er fleire lag som kan stjela poeng frå kvarandre, seier Sandal.

Saknar kamparenaen

Med pandemien som hinder i over eit år, er det ikkje noko anna som kan gjera kvardagen meir verdifull, enn å få spela kampar igjen.

– Vi treng berre å få spela kampar, det vil endra på alt. Vi har sakna kamparenaen noko enormt.

– Det blir diskutert fleire ulike måtar som vi skal få gjort unna seriespelet på, men for oss handlar det berre om å få spelt mot så mange lag som mogleg, seier Sandal.

Utfordrande oppkøyring

Med stadig nye beskjedar om kva som er lov og kva som ikkje er lov, stadig nye datoar for opning av seriespel, har oppladinga til årets sesong vore utfordrande.

– Det har vore utfordrande ja, men vi har heile tida valt å ta tak i dei positive tinga. No håpar vi det løyser seg med å få koma i gang med eit seriespel til hausten, avsluttar Sandal.