God start i Stavanger

I 2009 blei det beste 13-åringane i fleire fotballklubbar i Os samla på same lag.

Det siste året har Os-alliansen kome i drift igjen, med endå fleire klubbar involvert.

– Vi har spelarar frå Os Turn, Nore Neset, Søre Neset, Lysekloster og Søfteland, fortel Os-trenar Robert Nøss.

Til Sola på cup

Spelarane er i hovudsak frå 2000-årgangen, men supplert med nokre talent frå årstrinnet under.

Denne helga er ein tropp på 14 frå allianselaget til Os i Stavanger for å delta i Sola Elitecup, ei turnering med fleire av dei beste laga i Noreg.

– Vi bur på Sola vidaregåande skule, som ligg rett ved banane og hallen der vi et måltida.

– Cupen er veldig godt organisert og det har til no vore ein super tur, synest Nøss.

Speler semifinale i dag

Det er ikkje berre sosialt at turneringa har vore ein suksess. Laurdag spelte Os-alliansen sine innleiande kampar, og vann alle tre.

Her er resultata:
Os - Varhaug 2-1
Os - SIF 3-1
Os - Sola 4-1

Med desse resultata er Os klare for semifinale i dag, søndag. Kampen om finaleplass går mot Viking.

I den andre semifinalen speler Bryne mot Vard.