Hamna i arresten - på tredje forsøk

Klokka 00.47 natt til laurdag fekk politiet melding om ein mann som hamra på døra til ein annan mann på ei adresse nord for Os sentrum.

– Vedkomande, ein mann i 30-åra, fekk pålegg om å halda seg vekke frå vedkomande, opplyser vakthavande ved Bjørnafjorden politistasjon.

Men klokka 04.46 kom tilsvarande melding frå same adresse. Han var utagerande, og nytt pålegg blei gitt.

Men då det kort tid seinare kom eit nytt brot på pålegget, blei vedkomande køyrd i arresten og meldt.

Reagerte på lusking

I 07-tida laurdag morgon fekk politiet melding om ein person som luska rundt sør for Os sentrum.

Kva som gjorde at det blei karakterisert som «lusking», er ikkje notert i politiet sin logg, men vedkomande blei kontrollert, funnen «i orden» og dimittert.

Mogleg hærverk

Litt over midnatt fekk politiet melding om mogleg skadeverk på ein skule.

– Det var fem-seks ungdomar på staden, av begge kjønn, ifølgje meldar.

– Politiet har ikkje namn på desse, vi kjenner heller ikkje omfanget av eventuelt skadeverk.

Lyd frå russen

Det kom inn fire klagar på støy frå russ i natt, den første klokka 22.40, den siste klokka 03.10.

– Grunna andre oppdrag fekk ikkje patruljen svingt innom og snakka med dei før klokka 04.10. Då hadde festen roa seg, og dei skulle til å runda av.

Det kom også melding om støy frå ei privat adresse i Os sentrum. Den kom i 02-tida. Då patruljen kom innom, var det stille på staden.