Musikk | 14. mars 2022

I solidaritet med Ukraina: Samla inn rekordbeløp

– Vi held Vipps-nummeret ope til og med onsdag.

Det var gratis å koma inn, men dei over 300 gjestane vippsa rikeleg til støtte for Ukraina. (Foto: Kjetil Vasby Bruarøy)
Kjetil Vasby Bruarøy
Kjetil Vasby Bruarøymandag 14. mars 2022 10:06

Eit breidt spekter av lokale artistar, inkludert verdsstjerna Aurora, stilte søndag kveld for å spela støttekonsert i solidaritet med Ukraina.

Inntektene går uavkorta til Flyktninghjelpen.

Og inntektene blei uvanleg høge.

– Vi fekk inn nesten 130.000 kroner. Dette er all time high på denne typen arrangement, seier Gerhard A. Hansen, som jobba frivillig for kyrkja under gårsdagens konsert.

Vipps: 120.446 kroner
Kontant/kollekt: 9.308 kroner

– Tidlegare har det kome inn rundt 50.000 kroner. I tillegg har det gjerne tikka inn nokre større beløp frå firma eller kommune, eller under auksjon. Her er meir eller mindre heile beløpet henta inn frå enkeltpersonar.

Rundt 10.000 kroner kom inn via Vipps på førehand, resten kom under konserten. Cirka 400 var samla i Os kyrkje i går, inkludert musikarar og hjelpemannskap.

Det blei ikkje selt billettar, men fri entré og frivillig støtte via VIPPS 89773 til «Os Kyrkja Arrangement».

– Vi held VIPPS-nummeret ope til og med onsdag, om det er fleire som vil gi støtte til det lokale iniativet. Elles finst det mange fine måtar å gi på, i riksdekkande innsamlingar, seier Hansen.

Os kyrkje var farga i gult og blått søndag kveld. (Foto: Kjetil Vasby Bruarøy)

Vellykka initiativ

– Eg fekk ikkje fred på meg etter invasjonen av Ukraina, og ringte Arne Mæland, sa Øyvind Hægland då han for to veker sidan fortalte om planane.

Dei to har tatt initiativ til ei rekkje støttekonsertar frå solidaritet med Thailand etter tsunamien i 2004, blant anna Haiti i 2010, Syria i 2015, Jemen i 2018 og Dropen i Havet i 2020.

Arrangørar for konserten i går var eit samarbeid mellom Os Kulturutvikling, Os kyrkjelyd og Galleri Solbakkestova.

Publikum fekk ei fantastisk konsertoppleving.

– Eg såg NRK sin solidaritetskonsert førre måndag, og denne vi hadde lokalt her i Os kunne like gjerne vore sendt på TV. Det viktigaste var å samla inn pengar, men dette var verkeleg ei fantastisk musikalsk oppleving, synest Hansen.

Arne Mæland og den ukrainske presten og sjakkspelaren Dmytro Ostanin heldt ein fin og rørande appell.

Arne Mæland og Dmytro Ostanin tok begge til tårene under appellen i går. Det var dei ikkje åleine om. (Foto: Kjetil Vasby Bruarøy)

Midtsiden kjem med bildeserie og video frå konserten.

Konferansierar: Marie Lunde Bruarøy og Geir Magne J. Moberg

Musikarar og band:

  • Aurora
  • Eirik Søfteland og Olav Skorpen
  • Mighty Magnolias
  • Øyvind Hægland, Knut Inge Johnsen og Ole Amund Gjersvik
  • Anna Neset
  • Kari Fjeldstad, Aasmund Brekke, Arne Hernes og Nils Midtseter
  • Jan Haaland, Olav Skorpen og Nils Midtseter
  • Kristine Bjånes


Spennande? Vil du ha ukas høgdepunkt i innboksen?

Les meir om

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Fra 36 kr/uke
Se priser

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.