Ikkje forgifta i elva

Saman med brannvesenet tok Geir Helge Johnsen frå Rådgivande Biologar onsdag 23. mai prøver av elvebotn og gras langs austsida av Oselva for freiste å finne ut om det var frå desse stadene Hamnesjefen hadde blitt blyforgifta.

Hamnesjefen blei i vinter sjuk av det som viste seg å vera blyforgiftning og fekk behandling ved Osøyro Dyreklinikk. Ei behandling Os kommune tok store delar av kostnadane med.

No syner resultata av prøvane at det er lite sannsynleg at det er nærmiljøet i elvo som gjeve blyforgiftinga.

«Blyforgiftinga stammer sannsynlegvis ikkje frå nærmiljøet ved reiret, og det er nok mest sannsynleg at han har fått i seg bly ved næringssøk andre stadar i nærleiken av Osøyro, som td. Ulvevatnet. Svaner dykkar og et mellom anna vekster på botnen, og det er ikkje uvanleg at fuglar kan få i seg blyhagl
som då vert liggande kråsen og over tid lek ut.» skriv Johnsen i sin rapport til Os kommune.

Låge verdiar

Dei tre prøvene som no er teken syner eit blyinnhald godt under grensene for kva som vurderast som farleg.

«Analysane av sedimentet i elva viste lågt innhald av bly, med verdiar på 6,9 mg/kg tørrvekt nedst i elva (stad 3, midt i elva utanfor DNB-bygget, journ.mrk) og 8,9 mg/kg like nedom reiret (stad 2, ved dei øvste nausta på austsida av elva, journ.mrk.). Dette er låge verdiar, og alle verdiar under 30 mg/kg vert klassifisert som tilstand I = ”lite/ubetydeleg ureina” etter Klif sin skala frå I til V. Heller ikkje graset (prøve teken rett nedanfor reiret, journ.mrk) inneheldt bly, med lågare verdiar enn deteksjonsgrensa for analysane.», opplysar Johnsen.