Isglede på vatna

Bildeserie:

1 av 9

Måndag meldte frivillig is-målar John Lepsøy om strålande skøyteforhold ut veka. Det har skulane bete seg merke i. Torsdag var det eit yrande liv både på Ulvenvatnet og Banktjørna med elevar som hadde latt skulebøkene ligga og i staden nytta dagen ute i finvêret.

- Vi måtte jo nytta sjansen når tilhøva er så bra som no. Vi veit jo ikkje om det er eitt eller fleire år til neste gong moglegheiten er her.

- Det var som ein av elevane sa "no kan eg endeleg få bruka skøytene som eg fekk for eit år sidan", fortel lærar Jørn Vegard Berge.

Første gong på skeiser

Tysdag bestemte lærarane på mellomtrinnet seg for å nytte torsdagen på skeiseisen.

- Elevane blei ivrige når dei høyrde vi skulle på skeiser.

- Dei som ikkje har skeiser sjølv fekk lånt seg eit par i løpet av kort tid. I tillegg var det lærarar på skulen som hadde nokre par liggande, så alle som hadde lyst til å prøva har fått moglegheiten.

- For mange av elevane er det nok første gong dei står på skeiser.

Trygt fleire stader

John Lepsøy var, nærsagt sjølvsagt, på Ulvenvatnet for å kontrollmåla isen under Ulvenbrua torsdag.

- Der borte er den ikkje trygg på grunn av straum og salt frå vegen, men eg har merka det med nokre trær.

Også på Bjørnavatnet har Lepsøy vore ute å sjekka etter at han fekk telefon frå skulen på Søre Neset med spørsmål om det var trygt der ute.

- Også der er det flotte tilhøve. Den lille snøen som har kome gjer det bare enno flottare, med moglegheiten til å rydda både ishockeybane og lengdeløpsbane, smilar Lepsøy.

Lepsøy reknar med at det er trygt på dei fleste vanna, men ber likevel folk vera forsiktige og høyra med lokalkjende om det er områder der ein av erfaring veit at isen er svakare (til dømes ved bekkefar og lignande).

Varmar eit gamalt skeisehjarte

Ein times tid etter at vi forlet Lepsøy på Ulvenvatnet er han på tråden.

- No har eg nett vore bortom Banktjørna.

- Der var det eit yrande liv med minst eit par skuleklassar som dreiv på.

- Dette er heilt utruleg og varmar eit gamalt skeisehjarta, ler den frivillege is-målaren.

I følgje langtidsvarselet til yr.no skal det halda seg med minusgradar på Os også i veka som kjem, så helga kan nok trygt planlegga på isen.