Julerock på heimebane

Bildeserie:

1 av 5

- Vi har arrangert Julerock på utestadar i Os fleire gongar, men i år vil vi ha arrangementet i eiga stove, seier Kjetil Grønvigh frå Os Rockeklubb.

Warfart, K-Jell, Bombers, Neoplasma, Bone Shakers og Abstractium står på programmet 2. juledag. Søfteland Rock n LOL er med på å arrangera konserten.

- Her får vi alt frå band som kom til klubben no i haust til rockarar som nesten budde i rockeklubben på slutten av 80-talet, og som framleis er aktive. Alt blir på heimebane, som eit julebord for Os-rockarane. Berre utan bord.

Bombers i bomberommet
Tilfluktsrommet på Kuventræ er innreia med scene, lys- og lydutstyr, sofagrupper og bar. Kjetil ser fram til å høyra både gamle kjente og nye kjente i aksjon i rockeklubben.

- Neoplasma, som for ei stund sidan like gjerne kunne omadressert posten sin til rockeklubben sitt lokale, øver i nye lokaler no, og har hatt eit godt år. Eg er spent på å høyra kor gode dei har blitt.

- Og så utfordra eg Abstractium, unge musikarar frå Lysefjorden og Søfteland, som har tatt over stafettpinnen etter Neoplasma med å øva døgnet rundt, til å opna ballet, fortel Grønvigh.

Bombers blir blant veteranane i bomberommet.

- Olve, Pez og Tore spelar Motorhead slik Motorhead skal spelast. Det er utruleg kjekt at vi har fått dei til å koma og spela i klubben igjen.

K-Jell er nesten ferdig å spela inn neste album, og har planar for ny Kina-turné til våren. Også dei spelar på Julerock.

- Eg har høyrt platene, men det skal bli spennande å sjå dei LIVE. Luksus å sleppa å reisa til Kina for å oppleva dei, ler Kjetil.

Med gjesteliste
Klubben har fått skjenkeløyve til det lukka arrangementet. I lokalet har dei plass til 150 gjestar.

- Medlemmar i rockeklubben er inviterte, saman med dei som er med i Facebook-gruppa Julerock. Til no har vi 60 påmeldte.

- Konserten startar tidleg, dørene opnar klokka 19 og første band går på scenen i 19.30-tida. Sidan vi får gjestar som sikkert har mykje å snakka om, går vi over til å snurra plater i 1-tida om natta. Vi må ha det litt sosialt saman òg, seier Kjetil Grønvigh.