Kan sikra seriegull og KM-tittel på tysdag

Nore Neset/Os sine J17-spelarar fyller 17 år først i 2020, likevel vann dei KM i fjor og ligg an til ny KM-tittel i år.

– Om vi klarer det i år òg, så er vi det første laget i Hordaland som blir kretsmeisterar i J17 to år på rad, seier trenar Ørjan Sandal.

Tysdag rundar dei av serien heime mot Eikelandsfjorden. Serieleiar Nore Neset/Os kan klara seg med tap, men er uansett sikra om dei speler uavgjort med laget frå nabobygda, som ligg på 7. plass, eitt poeng bak 4. plass.

• Terminliste og tabell

5 kampar på 10 dagar

Dagens kamp var Nore Neset/Os sin 4. serierunde på 10. dagar. I tillegg har fleire av spelarane hatt ein kamp med damelaget i same periode.

– Årsaka til det tette programmet er at vi utsette nokre kampar då vi gjekk vidare i Adidas Cup.

Nore Neset/Os var suveren i finalen i Adidas Cup i slutten av september. Cupen blir kalla uoffisielt NM (NFF arrangerer NM berre i J16 og J19, ikkje i J17).

– Serien har ikkje vore prioritert. Men vi ønskjer å vinna alle kampar, og har ikkje tapt ein einaste kamp i haust.

Kvittingen avgjorde toppkampen

– Det som imponerer meg mest er at jentene presterer så stabilt bra, og at dei har fått eit nivå som gjer at dei kan vinna ein toppkamp også når dei er slitne og berre speler heilt ok, som i dag.

Gneist - Nore Neset/Os 0-1 (0-1).

Nore Neset/Os tok leiinga i 9. minutt ved toppskårar i avdelinga, Andrine Kvittingen, som sette inn sitt 13. for sesongen.

– Gneist skapte lite, men er store og sterke, og kan vera farlege på cornerar. Utover i 2. omgang skapte vi 3-4 store sjansar, og kunne punktert kampen, seier Sandal.

Men toppkampen enda 0-1.

Serieavsluttinga går på heimebane med kampstart klokka 20.15.