Torsdag om ei veke kjem Sverre Lunde Pedersen til Fjordloftet over 7/Eleven for å halda foredrag om trening.
Arrangementet er eit samarbeid mellom Opptur Løpeklubb og Askeladden Boats.
– Vi hadde lyst å arrangera eit foredrag for medlemmane våre igjen, førre fordrag var før pandemien, fortel formann i Opptur, Halvor Hagland.
Nyleg avtroppa styremedlem, Jonathan Dyrstad, er både aktiv med løping og dagleg leiar for Askeladden.
– Vi sponsar Opptur og har ein meir omfattande sponsoravtale med Sverre. Det er kjekt at vi tre kan samarbeida om dette, synest Dyrstad.
Sverre er i desse dagar i lett trening. Første samling før oppkøyring til neste sesong startar 1. mai.
– Eg driv meir med sykling enn løping, men er glad i fjellturar og løping i terreng, og vil dessutan snakka om kondisjonstrening generelt og intervalltrening spesielt, seier Lunde Pedersen.
Han har tidlegare halde foredrag for samarbeidspartnarar, og gler seg til å snakka om trening for løparar, syklistar og andre som møter fram.
– Foredraget er gratis og ope for alle, men vi har begrensa mengde sitjeplassar, derfor har vi lagt ut påmelding på Facebook- og Instagram-sida til Opptur, fortel Hagland.
Opptur, som i fjor skifta namn frå Opptur Motbakkeklubb til Opptur Løpeklubb, har over 50 medlemmar.
– Vi har nyleg skifta system for medlemsregistrering, og ikkje fått alle med over. Talet har lagt endå høgare, og aktivitetsnivået er veldig bra.
Måndagane har det vore felles lett løping i vinter, men no er Linken jaktstart i gang for sesongen. Onsdagane er det Lyshorn, fredagane på bane i Os idrettspark.
– Vi gler oss til å høyra på Sverre, til å få råd og motivasjon av ein som har vore i verdstoppen heile livet.
