Kjøpte ny bil for to veker sidan - så vann ho Mustang-trekninga

Sidan i sommar har AMFI Os brukt ein Mustang Mach E frå Ford Kverneland ståande utstilt.

Eksisterande medlemmar og nye medlemmar i senteret sin kundeklubb var med i trekninga, som skjedde etter at ny E39 opna.

Les òg– Ein klubb som har høg verdi for oss

Torsdag kveld blei vinnaren annonsert: May-Linn Røttingen får bruka Mach E-en gratis i seks månadar.

– Eg var medlem i kundeklubben frå før, og visste ikkje at eg også var med i konkurransen. Derfor trudde eg at senterleiar hadde ringt feil då ho sa eg hadde vunne, fortel May-Linn.

Etter 12 år i same bil kjøpte ho ny for to veker sidan. Likevel blei ho veldig glad for premien.

– Den nye bilen er ein hybrid, og den hadde kortare rekkevidde enn eg hadde venta. Dessutan er denne heilt fantastisk å køyra!

Det er også først no, med heilelekrisk, at familien får halv pris på ny E39.

– Eg jobbar innan helse i Bjørnafjorden kommune, men det blir mykje køyring på ungar til trening og kamp. Det passa dessutan godt å få bilen i går, sidan eg har fri i dag, seier May-Linn på veg på bytur med dottera.

Senterleiar Siri Ann Myhren Dalseide synest det var ein kjekk telefon å ta til vinnaren.

– Eg måtte jo seia det to gongar. Det er naurleg at folk blir overraska når dei vinn, ikkje minst viss dei ikkje er klar over at dei ved å vera medlem frå før også var med i trekninga.

På seinsommaren hadde kundeklubben vakse frå 8.000 til nærmare 9.000. No er den oppe i rundt 10.000 medlemmar.

– Vi skulle gjerne ønskt oss endå tettare med folk under seremonien i går, men samla sett blei det ein ekstra god torsdag.

– Normalt har vi rundt 3.000 gjestar på senteret på dagar som denne, i går hadde vi 4.000 innom.