Los i Os: Hagafjøra

«Los i Os» er ein serie på Midtsiden med dronevideo og presentasjon av fjell og andre turområde i Osbygda og nokre nærområde.

Tekst og foto: André Marton Pedersen

Noko av det eg liker aller best er å studera kartet over Bjørnafjorden og sjå etter flotte stedar å besøka. Det å koma til ein ny stad er spennande, det er fint å oppdaga ulike perler i heimkommunen. Vi er heldige som har mange flotte fjører, viker og holmer vi kan nyta om sommaren.

Ein av desse flotte plassane er friluftsområdet Hagafjøra i Eikelandsosen, som er drifta av Bergen og Omland Friluftsråd (BOF).

Hagafjøra er utstyrt med toalett, fleire bord, fast grill og baderampe for bevegelseshemma. Også toaletta er tilpassa handikappa.

• Sjå også bof.no

Området er vestvendt, så her kan du nyta seine sommarkveldar.

Parkeringsplassen ligg i kort avstand til fjøra, stien ned er brei og fin.

Friluftsområdet ligg nokre få minutt med bil frå Eikelandsosen sentrum, så om du har gløymd å kjøpa skillingsbollar, så er hjelpa ikkje langt unna.

Hagafjøra er ein nydeleg plass som er mykje nytta av lokalbefolkinga. Er eg over fjorden i sommar, så kjem eg òg!

Helsing André, turlos i Os