Lokal | 23. sep. 2018

Mannskap redda med helikopter etter Osfjord-havari

Ei veke etter at Osfjord blei selt står fraktebåten på grunn.

Osfjord grunnstøtte laurdag morgon og står no på skjer utanfor Linesøya i Trøndelag. (Foto: Redningsselskapet)
Kjetil Vasby Bruarøy
Kjetil Vasby Bruarøysøndag 23. sep. 2018 08:34

MS «Osfjord» var på veg frå Brønnøysund til Kristiansund då den grunnstøtte og tok inn vatn utanfor Linesøya i Trøndelag.

Det var så høg sjø at redningsskøyta ikkje kom seg ut til havaristen, mannskapet på fire blei berga med redningshelikopter, skriv BT.no.

Fraktebåten har dei siste åra vore eigd av Osfjord Bulk Ltd frå Nordstrøno.

– I går var det akkurat ei veke sidan vi selte båten, seier Pål Gunnar Stabben til Midtsiden.

Ny eigar er frå Nord-Noreg og har bemanna båten med eige mannskap.

Gamal, men nyoverhalt

Ifølge BT fekk båten motorstopp og dreiv på land. Ifølgje Stabben sine kjelder står hovudmotoren framleis og går, mens båten står på skjer.

– Det var nok ei dramatisk oppleving, og det er litt overraskande at dette skjedde, sjølv om det er ein gamal båt.

Båten er bygd i 1967, er 47 meter lang og 8,8 meter brei.

– Osfjord har fungert godt for oss dei 12-15 åra vi har hatt den, og det er berre 7-8 månadar sidan hovudmotoren var på full overhaling.

To båtar i nytt selskap

Pål Gunnar Stabben driv shipping saman med broren Ronny. Brørne med familie flytta frå Kristiansund til Strøno i Os i 1995.

Osfjord var siste båt som sto i selskapet Osfjord Bulk ltd, all aktivitet er no i Stabben Shipping AS, som brørne eig i lag.

– Vi har to båtar no, «Faktor» og «Merkator». Dei går i hovudsak med frakt i Hordaland og Rogaland, men den største, «Merkator», er òg til Danmark og Sverige med last, fortel Pål Gunnar.

Selskapet har vakse etter etablering i 2016, og har no 25 tilsette.

Spennande? Vil du ha ukas høgdepunkt i innboksen?

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Fra 36 kr/uke
Se priser

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.