Morgonfugl klar for å opna matvogna

I september viste kokken Lukasz Brekke fram den nyinnkjøpte foodtrucken sin, no er matvogna nymalt og ferdig utrusta.

– Eg har fått testa den nokre gongar, blant anna då Os Caravan & Fritid opna ny butikk. No er også alle papir på plass, fortel Lukasz.

Torsdag blir første dag i drift. Trass namnet, siktar han seg også inn på frukostmarknaden.

– Eg kjem til å opna klokka 06. Då er fleire på veg til jobb eller ut i felten, kanskje vil dei ha noko raskt, men smakfullt å eta.

Brekke fortel om stor interesse for tilbodet, og nokre firma som har kontakta han.

– Planen er at eg også skal retta meg mot bedriftsmarknaden. Ved eit visst volum kan dei få maten levert, anten det er frukost eller lunsj.

Førebels står Lunsj-Ekspressen på midlertidig tomt litt over Røde Kors-bygget, der dei søker om å få ei meir permanent plassering.