NM: Fana og Os barkar saman i kveld

Os har, så vidt Midtsiden hugsar, kvalifisert seg til NM kvart år etter at dei i ekstraomgangar i 2011 tapte 4-1 for Bjarg i andre kvalifiseringsrunde.

I årets første kvalifiseringsrunde fekk dei walkover (mot Odda), men no møter dei møter uvanleg sterk motstand i andre kvalifiseringsrunde.

Fana landa rett nok på 7. plass i 3. divisjon i fjor, men spelte i 2. divisjon i 2017 og tok seg til 2. runde i NM både i 2017 (slo Bjarg 0-1 og tapte 5-1 for Florø) og 2016 (slo Sotra 3-1 og tapte 1-3 for Nest-Sotra).

– Vi skal til NM i år òg, vi skal slå Fana i kveld, seier ein kamplysten Os-trenar, Endre Brenne.

Han håper Os-supportarane stiller sterkt på Nesttun kunstgress til avspark klokka 18.00 i kveld.

Stiller redusert - men slagkraftig

Os starta vinteren bra, med ein god treningskamp mot Fana, trass 0-2-tap, og siger over Fyllingsdalen. Også på treningsleiren spelte Os godt, men i dei siste kampane har ikkje alt stemt. 0-3-tap for Stord og 2-0-siger over Varegg var begge skuffande resultat.

– Det har svinga litt, men det er òg naturleg i treningskampane gjennom vinteren. Vi har trent hardt, men har no sleppt opp litt, og hadde gode økter både fredag og i går, med finpuss på spelestil og struktur.

Os må klara seg utan fartsfantomet Øystein Takle Eide, som er ute med kneskade heile sesongen, og har også andre sentrale spelarar ute med skade; Rafael Villén, Harry Moore og Sander Kvittingen. I tillegg er Torgeir Lunde og Frode Storebø vekkreist. Marius Mikkelsen er kanskje tilbake, men det får Brenne først svar på i oppvarminga i ettermiddag.

– Vi skal likevel stilla slagkraftig tropp, og vi gler oss veldig til å koma i gang med sesongen, seier Endre.

– Dei møter eit anna Fana i kveld

Fana-trenar Ørjan Håland møtte eit Os som skapte mange sjansar og fekk til mykje av spelet sitt i begge lag sin første treningskamp i vinter.

– Vår prestasjon var nok prega av at eg var ny for spelarane mine, og dei var ny for meg. I tillegg til at vi ikkje hadde kome langt med struktur, var det mange som ville visa seg fram, og det blei mykje éin og éin.

Fana har tapt for Sanviken og Brann 2 i treningskampar i vinter, men slått Frøya, Fjøra og Solid, sistnemnde 4-0 i første kvalifiseringsrunde.

– I dei siste tre kampane har vi sett veldig bra ut, det er eit anna Fana Os møter i kveld. Vi har òg nokre spelarar ute med skade, men stiller med ein sterk tropp på 14 spelarar. Backane til Os skal få køyrd seg, vi har to unge, raske og lovande kantspelarar, åtvarar den tidlegare assistent-trenaren til Os, også han med klart mål om å kvalifisera seg til årets NM.