Bildeserie:
Denne veka er det seriestart på heimebane for alle seniorlaga i Os kommune - bortsett fra A-laget til Os, som vann på bortebane måndag.
Les òg: Seriestart utan toppskårar
I går var det start for 5. og 6. divisjon, der Søfteland klarte seg bra utan toppskårar Niklas Linde og vann heile 6-1 over den tidlegare 5. divisjonsklubben Rosendal.
Lysekloster 2 tok imot Viggo, med blant andre Ramo Racic, Joakim Hovden og Tore Valvik i troppen. Kampen enda 2-2.
Os 2 spelte heime mot Ny-Krohnborg, som til liks med Os 2 rykte ned frå 4. divisjon i fjor haust.
– Ikkje god nok framfor mål
Terje Kvittingen, som er med i det sportslege apparatet rundt Os, er nøgd med kampen, men ikkje resultatet.
– Vi var hakket betre enn dei i første omgang, og etter pause var det berre eitt lag på banen.
– Ny-Krohnborg har rett nok enkelte gode spelarar, men framsto som dårleg trent. Men dei hadde marginane med seg og fekk seg ei skåring på ein overgang.
Kampen enda med 0-1-tap.
– Vi var ikkje suverene i spel og sjansar, men hadde 8-10 kvalifiserte sjansar og med normal utteljing burde rundt tre av desse ført til skåring.
– I staden blei det stolpeskot og utanfor. Vi var ikkje kvasse nok framfor mål i går, men resten av kampen kan vi vera nøgd med.
– Det var også kjekt å sjå keeper Martin Tysseland og kaptein Håvard Grøteide i så god form etter at dei begge har vore lenge vekke med kyssesjuke, seier Kvittingen.
I kveld (kl 18) møter A-laget 2. divisjonsklubben Vard Haugesund til første NM-runde, fredag (kl 19) speler Søre Neset/Nore Neset heime mot Eikelandsfjorden, laurdag (kl 15) speler SN/NN 2 heime og søndag er det både lokaloppgjer mellom Os og Lysekloster (kl 16) og seriestart for damelaget til Os (kl 19).