Ny divisjon, ny kaptein, same strategi

I morgon har damelaget seriestart på heimebane. Der kan dei møta andre frå Os.

– Kampen mot Åsane 2 i haust viste oss verdien av eit godt publikum. Vi treng nok god støtte i år òg, seier Andrine og Lenea. (Foto: Kjetil Vasby Bruarøy)
Kjetil Vasby Bruarøy
Kjetil Vasby Bruarøytirsdag 19. apr. 2022 17:57

Onsdag tar Os imot Arna-Bjørnar 2 til seriestart i 2. divisjon.

Kampen startar klokka 19.

Arna-Bjørnar har fire osingar i stallen. Det er foreløpig ukjent om Madelen K. Holme, Linnea Sælen eller Vilde Drange Veglo blir del av troppen i morgon. Nora B. Nøss er som kjent ute med kneskade.

Offensiv haldning til vanskeleg sesong

Heimelaget går til kamp med same innstilling som i opprykkssesongen 2021; Os skal vera offensive og skåra mange mål, ikkje trø varsamt i forsøk på å sikra seg nokre poeng.

– Vi er klar over at vi møter tøffare motstand, men vi er også vant til å levera under press, både frå aldersbestemt serie og cupar og dei tøffe opprykkskampane i fjor, sa Andrine Brunvatne Kvittingen og lagvenninna Lenea Fløysand då Midtsiden var innom gårsdagens trening.

Godt humør i kveldssola måndag. Her er Lenea og Gjertrud T. Håvardstun klar for å ta imot hjørnespark. (Foto: Kjetil Vasby Bruarøy)

– Det er kjekkare for både jentene og publikum om vi speler på det vi er gode på frå før. Vi har ambisjon om, på sikt, å klatra forbi 2. divisjon.

– Då må vi ha tru på det vi held på med, om det så fører til at vi kanskje må ta eit steg tilbake før det går på fram igjen, seier hovudtrenar Ørjan Sandal.

I årets sesong skal forbundet redusera frå 8 til 2 avdelingar i 2. divisjon. Å halda seg i år vil vera ei stor bragd.

Også nedover i rekkene blir den humørfylte, offensive fotballen dyrka.

Damelaget hospiterer inn yngr spelarar frå Nore Neset/Os J17 og tre gode frå Os J15. Sandal er dessutan innom og tar treningsøkter med heile 2008- og 2007-årgangen.

Ny kaptein

Andrine har overtatt kapteinsbindet frå Thale Strønen Skeie.

– Thale har vore ein eksemplarisk kaptein heilt frå eg overtok jentelaget til sesongen i fjor. Årsaka til at vi endrar kaptein er at Thale skal i militæret i juli. Vi ønskjer at årets kaptein står heile sesongen, forklarer Sandal.

Thale (t.h.) er i trening igjen, og i troppen til serieopninga i morgon. Her saman med Tiril Solberg og Kine Moland (midten). (Foto: KVB)

Thale blei skadd og mista heile oppkøyringa, men er i troppen til i morgon. Sandal meiner Andrine er ein god erstattar til å bera kapteinsbindet.

– Det er ikkje vanleg at ein spiss er kaptein, men Andrine er, til liks med Thale, ein naturleg leiarfigur og ein god spelar.

Nye spelarar - nye roller

Mens Andrine er ny som kaptein, har Lenea blitt flytta frå midtbane til angrep.

– Det er litt deilig å ha mindre defensivt ansvar, men også uvant. Eg kjem kanskje til å ta nokre fleire og djupare returløp enn eg bør no i starten på sesongen, seier Lenea og ler.

Trass ein del sjukdom under omikron-toppen i vinter, synest dei at oppkøyringa har vore god.

– Det har vore kjekt å spennande både å få spelarar tilbake og å få nye lagvenninner i troppen. Eg føler vi er godt førebudde på auka motstand.

Mens Anne Noss Nordvik og Malin Solstrand Ludvigsen har kome tilbake, er Maria Alvestad Horn og tvillingsøstrene Pernille og Henriette Veiteberg Wollan nye på Os.

Tvillingsøstrene Pernille (t.v.) og Henriette gjekk i vinter frå Gneist til Os. (Foto: Kjetil Vasby Bruarøy)

– Vi kjenner Ørjan frå før, både privat og som trenar på fotballcamp på Mallorca, fortel søstrene.

Dei kjenner også til ein del av jentene på laget, etter fleire år med rivalisering då 2003-årgangen spelte aldersbestemt.

– Det var jo uvant å koma på lag med desse, men vi har blitt veldig godt mottatt og trivst i gruppa!

For Pernille sin del blir det også uvant med ny rolle på banen.

– Men det skal gå greit. Det er fleire på laget som har måtta læra seg nye ting i vinter, det viktigaste er at vi er gode saman.

Bildeserie:

Høgre eller venstre - følgja stemma eller peikinga? Treninga blei avslutta med konkurranse. (Foto: KVB)
Vy Nguyen la stødige cornerar på trening i går. (Foto: KVB)
Fleire gjekk rett i nota. (Foto: KVB)
Høgre eller venstre - følgja stemma eller peikinga? Treninga blei avslutta med konkurranse. (Foto: KVB)
Vy Nguyen la stødige cornerar på trening i går. (Foto: KVB)
1 av 3
Vy Nguyen la stødige cornerar på trening i går. (Foto: KVB)
Fleire gjekk rett i nota. (Foto: KVB)
Høgre eller venstre - følgja stemma eller peikinga? Treninga blei avslutta med konkurranse. (Foto: KVB)

Skal ned frå 8 til 2 avdelingar

I fjor hadde Os sin beste sesong sidan opprykket til 1. divisjon i 1997.

Foto: Anne Strønen
Les ògDamelaget: Fortid og framtid

Sandal skal ikkje berre leia spelarane i ny divisjon, i år blir det ekstra krevjande å halda seg i 2. divisjon

I 2022 skal forbundet redusera mengda 2. divisjonsavdelingar frå 8 til 2 avdelingar. Det vil i praksis bety at du må godt opp på øvre halvdel av tabellen for å unngå nedrykk.

Vedtaket blei fatta i juni i år, sjå fotball.no og tilsvarar reduksjonen som blei gjort i 2. divisjon herrar i 2016, då debutant Lysekloster kom på 9. plass og rykte ned til 3. divisjon.

  • I dag er det totalt 70 lag fordelt på 8 avdelingar i 2. divisjon, nokre avdelingar har berre 5 og 7 lag, andre har 10 eller 12 lag.
  • Dette skal etter 2022 ned til 28 lag i 2 avdelingar.

Spennande? Vil du ha ukas høgdepunkt i innboksen?

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Fra 36 kr/uke
Se priser

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.