F.v.: Prosjektsjef Kjetil Løvaas, eigar Karsten Austevoll og fabrikksjef Øyvind Magnussen framfor byggeplassen. (Foto: Kjetil Vasby Bruarøy)

Ny fabrikksjef hos Inka

Øyvind Magnussen (46) har vakse opp i laksebransjen. No skal han styra Europas mest avanserte foredlingsfabrikk.

image
image
image
image
image
image
image
image
image
image
image
Av: Kjetil Vasby Bruarøy

I sommar starta bygginga av Inka AS sin 5.500 kvadratmeter store fabrikk i Gjelevika i Øyane.

Karsten «Kakki» Austevoll har jobba med fiskeforedling på Gjelevika sidan 1983, ein kontrakt verdt over to milliardar kroner har gitt han tryggleik til å ta den store investeringa.

Kontrakten og satsinga, som inkluderer ei innreiing av det aller nyaste innan produksjonsteknologi frå Marel, blei kjent under sjømatmessa i Brussel 7. mai. Parallelt har Kakki søkt etter ny fabrikksjef.

– Det er naturleg å styrka laget når du går inn i ei utviding som denne. Responsen på stillingsannonsa var veldig god. Vi fekk 35 søkjarar, 11 av dei var veldig gode, 3 av desse var med i siste runde. Det var gode, men ulike kandidatar, fortel Austevoll.

Valet landa på Øyvind Magnussen (46) frå Askøy. Han «ramla» inn i bransjen mens han venta på opptak til Politihøgskulen. I mars i år bestemte seg for å sluttahos Sekkingstad. Jobben hos Inka er ein av dei første han nokosinne har søkt på.

– Det er ein trend med å flytta produksjon ut av Noreg. Når nokon satsar så stort, og på noko som blir heilt i internasjonal tet teknologisk, så er det naturlegvis veldig attraktivt å få vera med på, seier Magnussen om årsaka til at han søkte på jobben.

– Dessutan kjenner eg Kakki frå før. Han og Inka har eit veldig godt ord på seg i bransjen.

Klatra raskt i gradane

Magnussen var ferdig med førstegongsteneste i 1993, og ville bli politi. Men han fekk ikkje lov av mora å vera heime og slappa av i vekesvis mens han venta på neste opptaksrunde til Politihøgskulen.

– Det var ei tid med få ungdomar i fiskeforedlingsbransjen. Som rekrutteringstiltak hadde Rolf Olsen AS eit opptak av ti unge kandidatar, som fekk jobba ved fabrikken i tre månadar, der éin av desse fekk betalt utdanning og fast jobb.

Også den gong sto det mellom tre personar, og Øyvind blei den eine. Tre år seinare hadde han fagbrev i slakt og foredling, tre år etterpå var han avdelingssjef.

Rolf Olsen selte sjømatdivisjonen i konsernet til Pan Fish i 2001. I 2003 ble Magnussen tildelt rolla som dagleg leiar i bedrifta. Pan Fish snakka om å legga ned, i staden fekk Øyvind fabrikken selt til Sekkingstad, som han altså har jobba for fram til i år.

Magnussen har vore med på begge eigaskifta og flyttelasset til Sotra, i tillegg har han jobba for Sekkingstad i Danmark.

25 semitrailerar med avansert teknologi

– Kor mange er det som jobbar hos Inka i dag?

– Vi har 40 faste, men 70 i sving når vi i høgsesong er over på to skift, fortel Austevoll.

– Skal de søkja etter mange fleire folk før ny fabrikk skal i drift?

– Vi skal tilsetja fleire, ja, men med den utstyrsparken som skal inn i ny fabrikk er det ulike typar kompetanse vi ser etter.

25 semitrailerar med utstyr, mykje av det er avansert teknologi, kjem i april.

– Då må vi ha kompetanse innan data og automasjon på plass.

Marel, som besøkte Inka seinast i førre veke, bygger heile produksjonslinja i deira eigen demohall i Danmark før transport av utstyr og maskiner til Os og Øyane. Frå januar sender Inka folk på opplæring i Danmark.

– Kvar einaste filét blir fotografert, kvart bilde blir analysert av ei datamaskin. Digitale grensesnitt blir avgjerande for lønsemda, forklarer Inka sin prosjektleiar, Kjetil Løvaas.

Klarer du for eksempel å bruka 0,5 % meir av fisken, og har 15.000 tonn gjennom fabrikken, tilsvarar det 75 tonn ekstra matfisk per år.

Eit grønt bygg

Det har allereie vore 50 semitrailerar til Gjelevika med element til bygget. For eit par veker sidan måtte ein mobilkran installerast, men den kunne ikkje koma bilvegen.

– Den er tung. Vi fekk ikkje dispensasjon til å køyra den over bruene ut her, og måtte frakta den direkte til Gjelevika med ferje.

Bygget går over to etasjar, og andre etasje har for lengst byrja å reisa seg.

– Kjøl og frys produserer mykje varme, bygget blir installert med god gjenvinning av denne.

Den nye fabrikken får blant anna opphaldsrom, minikjøkken og dusj for langtransportsjåførar, eige trimrom for tilsette og kantine med plass til 80-100 tilsette og gjestar.

Meir enn tredobla kapasitet

Den nye fabrikken skal vera tett til jul og ferdig til sommaren 2020.

– Vi ligg godt an. Helgesen Tekniske Bygg har god styring av byggeprosjektet, og bruker ein del lokale leverandørar, seier Løvaas.

Den gamle fabrikken blei innreia med mykje nytt utstyr i 2016, og skal drivast vidare parallelt.

• Videoreportasje: På innsio hos Inka (2016)

I dag produserer Inka 6000 tonn foredla fiskeprodukt i året, rundt 40 variantar av 15 ulike produkt. I fjor blei det omsetnadsrekord med 97,3 millionar kroner.

Ny kontrakt sikrar 13.000 tonn i året, noko som tilsvarar 250-300 millionar per år. Til saman har dei to fabrikkane ein kapasitet på 18.000 tonn per år, på eitt skift, men begge kan drivast av fleire skift ved behov.

Fleire saker