F.v.: Arnt Inge, Roger, Lukasz og Tina - klare for opning av Halhjem Kafé. (Foto: Kjetil Vasby Bruarøy)

Nytt team klar for å opna Halhjem Kafé

Lukasz sitt kokkelag byr på heimelaga husmannskost når dei søndag re-opnar Halhjem Kafé.

image
image
image
image
image
Av: Kjetil Vasby Bruarøy

I juli teikna gourmetkokk Lukasz Brekke leigekontrakt på Halhjem.

– Eg held på det gamle namnet, Halhjem Kafe er godt etablert, og ville nok på folkemunne blitt kalla det same uansett, seier Lukasz.

Ved sidan av ny jobb i Nordsjøen driv han cateringverksemd med selskapet Det Naturlige Kjøkken. No får han både utvida plass til cateringverksemda, selskapslokale til utleige og restaurant som er open kvar søndag.

– Etter at eg overtok har det kome sju bestillingar på selskap, blant anna konfirmasjonar. Vi rekk òg å få med oss julebordsesongen, elles er lokalet godt eigna til blant anna bryllaup.

Husmannskost - med ein ekstra spiss

I mars 2015, etter 49 år i drift, hadde huseigar Karla Larsen siste opningsdag på Halhjem Kafé. Leigetakarar Halhjem Kjøkken AS pussa opp begge etasjane og kom i drift i mai same år, men i oktober i fjor la dei inn årene.

Førstkomande søndag opnar kafeen igjen.

– Det blir søndagsbuffet med varme og kalde rettar, fisk og kjøt kvar søndag. Middagen er naturlegvis heimelaga, med heimeskrella poteter, men vi skal også kaker, dessertar, og pålegg som leverpostei og røykelaks er heimelaga og heimerøykt.

– Samtidig vil det vera mogleg å kjøpa berre middag, utan å måtta betala for ein heil buffet. Vi ønskjer at Halhjem Kafé skal halda fram å vera folkeleg og barnevenleg, med eigen barnemeny og gratis is. Samtidig lager vi maten på vår måte, med ein vri vi håper gjestane har sans for.

– Eit godt team

Lukasz sitt selskap har mor Joanna Brekke som dagleg leiar og eigar, til drifta har han fått med seg eit mannskap med god erfaring.

Tina Bøe Buer er matentusiast og råvareleverandør, Roger Engevik jobbar som kokk i Nordsjøen og Arnt-Inge Bjoarvik tok fagbrev som kokk før han blei køyrelærar.

– Med reisejobb og mange jern i elden er det godt å ha flinke hjelparar. Lokalet og kjøkkenet var fint frå før, og etter smårydding og litt justering på utstyrsparken er vi no klare for opning.

Sjølv om kapasiteten er stor, både i lokalet og på kjøkkenet, vil kafeen ta imot bordbestillingar.

– Då Karla dreiv kafeen var det ofte kø utanfor ved opning. Dei som vil vera sikre på å få plass kan ringa først.

Fleire saker