Omvendt bursdag: Kjøper ny hjartestartar til Os turn

I går fekk politiet melding om tjuveri av hjartestartar frå utsida av kiosken på Kuventræ.

Os turnforening fekk ny hjartestartar i oktober i fjor, etter at den som redda liv i 2017 blei stolen. Trass to tjuveri er dei framleis opptatt av at denne skal henga ute.

I dag løyste det seg òg raskt.

– Vi må kunna bidra litt, seier kjøpmann Trond Hope, som sjølv har bursdag i dag.

Vegen var kort til bestilling, ein tidlegare tilsett, Kristian Eck, jobbar no hos hjartestartarleverandør Røde Kors Førstehjelp AS.

– Ei viktig sak på ein viktig stad

Rema 1000 Kuven stasjon er frå før sponsor av Os Fotball, både med sal av fotballbrød og med ein meir omfattande sponsoravtale.

– Dette er ein lei sak, etter ein episode som aldri burde skjedd. Det er trist at ein hjartestartar må erstattast, og viktig at denne er tilgjengeleg utandørs, på ein stad som Kuventræ, der folk i alle aldrar samlast.

Hope har sjølv hatt hjartestartar i butikken i over ti år.

– Den har heldigvis ikkje vore i bruk, men det er godt å ha den i nærleiken om det skulle bli behov.

– Du er raus på bursdagen din - har du sjølv fått gåve i dag?

– Eg har vore på jobb i heile dag, men kanskje eg får noko seinare. Gåver er uansett ikkje så viktige i min alder, eg har fått mange gratulasjonar, og det varmar.