Opnar kafé i Brugata

To søstrer frå Strøno bruker bestemora sitt namn på kafeen dei skal starta i Os sentrum.

Kjetil Vasby Bruarøytirsdag 28. des. 2010 12:27

- Vi vil prøva å laga ein plass der vi sjølv kunne tenkt oss å gå, med heimelaga mat og koseleg atmosfære, seier Borghild Strønen.

Ho og søstera Dagrun Fjellbakk har spøkt lenge om å opna kafé på Os, både fordi dei meiner Os manglar eit godt kafétilbod, og fordi dei sjølv er glade i å laga mat.

- Då vi arva nokre ting for om lag eit år sidan, og sa «denne kan vi ha på kafeen» om ein og annan gjenstand, byrja det å bli alvor, fortel Dagrun.

Bestemor Engeline
Både Borghild og Dagrun bur framleis i Nordstrøno, der dei vaks opp. Borghild jobbar i administrasjonen på Voss Sjukehus, Dagrun i daglegvarebutikken Rimi i Os sentrum.

- Eg tar permisjon frå Rimi frå mars av, seier Dagrun, som også har jobba i 12 år som servitør på Solstrand.

Borghild er med på planlegging og gjennomføring, men blir førebels verande på Voss i vekene.

- Kva skal kafeen heita?

- Vi er bestemødre begge to, og såg litt på namn blant eigne slektningar då vi skulle velja namn til kafeen. Sida bestemora vår heitte Engeline trengte vi ikkje leita lenge, namnet blir Kafé Engeline.

Heimekos og gjenbruk
Søstrene frå Strøno vil ha interiør som passar til heimelaga mat, få glatte flater og lite børsta stål.

- Vi skal pussa opp, men vi har sans for gjenbruk, og vil ikkje ha ein kafé som ser for moderne ut, fortel Borghild.

Med ope frå morgon til sein ettermiddag har dei plan om å ha både frukost, lunsj og middag på menyen.

- Påsmurt, baguettar og vaflar skal vi i alle fall ha, og dagens middag og dagens suppe. Vi er veldig glade i fisk, så det blir nok ein del maritimt på menyen, trur Dagrun.

Intime minne
Buggegården har fleire gongar tidlegare husa serveringsplassar. I haust blei det arrangert stor fest i Fjellheim til minne om den første, Kafé Intim, av Buggefamilien sjølv.

- Vi fekk dessverre ikkje med oss festen, men har mange gode minner frå Kafé Intim, frå nyttårsfeiring med ungdomslaget til pommes frites-lukta, som eg føler eg kan kjenna enno, seier Dagrun.

Vil opna i mars
I februar byrjar dei å pussa opp første etasje i Buggegården i Brugata, med håp om å vera klar til opning i løpet av mars ein gong.

- Det var ein vasslekkasje i bygget for nokre veker sidan. Når dei er ferdig med å rydda opp etter denne set vi i gang.

- Kvinnedagen 8. mars ville vore ein passande dag å opna på, men det er førebels for tidleg for oss å setja nokon opningsdato, seier Borghild og Dagrun.